മുംബയ്: റിലയന്സ് മേധാവി മുകേഷ് അംബാനിയുടെ വീടിനുസമീപത്തുനിന്ന് സ്ഫോടകവസ്തുക്കള് നിറച്ച കാര് കണ്ടെത്തിയ സംഭവത്തില് നിര്ണായക വിവരങ്ങള് പുറത്ത്. കാറില് നിന്ന് കണ്ടെടുത്ത കത്തിന്റെ ഉള്ളടക്കവും പൊലീസ് വെളിപ്പെടുത്തിയിട്ടുണ്ട്. ഇത് വെറുമൊരു ട്രെയിലര് എന്നാണ് കത്തില് എഴുതിരുന്നത്. ‘ ഇത് വെറുമൊരു ട്രെയിലര് മാത്രമാണ്. ഇത് കൂട്ടിയോജിപ്പിക്കാത്ത സ്ഫോടക വസ്തുക്കളാണ്. അടുത്തവണ ഉറപ്പായും എല്ലാം ശരിക്കും ഫിറ്റുചെയ്ത് തരാം എന്നാണ് കത്തിന്റെ പൂര്ണ ഉള്ളടക്കം.
കാറില് ഡ്രൈവര് സീറ്റിനരികില് മുംബയ് ഇന്ത്യന്സ് എന്നെഴുതിയ ബാഗില് നിന്നാണ് കത്ത് കണ്ടെടുത്തത്. അതിനിടെ സംഭവവുമായി ബന്ധപ്പെട്ട് അഞ്ചുപേര അന്വേഷണ ഉദ്യോഗസ്ഥര് ചോദ്യംചെയ്തു. എന്നാല് ഇവരില് നിന്ന് എന്തെങ്കിലും വിവരം ലഭിച്ചിട്ടുണ്ടോ എന്ന് വ്യക്തമല്ല. സ്ഫോടക വസ്തുക്കള് കണ്ടെടുത്ത സ്കോര്പിയോ മുംബയ് വിക്രോളിയില് നിന്ന് മോഷ്ടിച്ചതാണ്. വാഹനം മോഷണംപോയെന്ന് കാണിച്ച് ഉടമ പൊലീസില് പരാതിയും നല്കിയിട്ടുണ്ട്. സ്കോര്പിയോയില്പിടിപ്പിച്ചിരുന്ന നമ്ബര്പ്ലേറ്റ് വ്യാജമായിരുന്നു എന്നാണ് പൊലീസ് നല്കുന്ന സൂചന.
സ്ഫോടക വസ്തുക്കള് നിറച്ച കാര് മുകേഷിന്റെ വീടിന് തൊട്ടടുത്ത് പാര്ക്ക് ചെയ്യാനായിരുന്നു അക്രമി ലക്ഷ്യമിട്ടിരുന്നതെന്നാണ് പൊലീസ് പറയുന്നത്. എന്നാല് ശക്തമായ സുരക്ഷ കാരണം ഇതിന് കഴിഞ്ഞില്ല.തുടര്ന്നാണ് കുറച്ചകലെ മാറ്റി കാര് പാര്ക്കുചെയ്തത്. രണ്ടുമണിക്കൂറോളം ഡ്രൈവര് പുറത്തിറങ്ങാതെ വാഹനത്തില് തന്നെയിരുന്നു. ഇയാളെ കണ്ടെത്താന് പ്രദേശത്തെ മുഴുവന് സി സി ടി വികളും പരിശോധിക്കുന്നുണ്ട്.
ഇന്നലെയാണ് മുംബയിലെ മുകേഷ് അംബാനിയുടെ ആഡംബര വസതിയായ ആന്റിലയ്ക്ക് സമീപത്ത് സംശയകരമായ നിലയില് കാര് കണ്ടെത്തിയത്. സുരക്ഷാ ഉദ്യോഗസ്ഥരാണ് പൊലീസിനെ വിവരമറിയിച്ചത്. ബോംബ് സ്ക്വാഡ് നടത്തിയ പരിശോധനയില് ജെലാറ്റിന് സ്റ്റിക്കുകള് കണ്ടെത്തുകയായിരുന്നു. ഇരുപത്തൊന്ന് ജെലാറ്റിന് സ്റ്റിക്കുകളാണ് കാറിലുണ്ടായിരുന്നത്. പിന്നീട് നടത്തിയ വിശദമായ പരിശോധനയില് അഞ്ച് വ്യാജ നമ്പര്പ്ലേറ്റുകളും കത്തും കണ്ടെത്തിയത്.
നമ്പര്പ്ലേറ്റുകളില് ഒരെണ്ണം മുകേഷ് അംബാനിയുടെ സുരക്ഷാ സംഘത്തിന്റെ വാഹനവ്യൂഹത്തിലുണ്ടായിരുന്ന സ്കോര്പിയോയുടെ നമ്പ റിന് സമാനമാണ്. പുലര്ച്ചെ ഒരു മണിയോടെയാണ് കാര് പ്രദേശത്ത് പാര്ക്ക് ചെയ്തതെന്ന് സി സി ടി വി ദൃശ്യങ്ങളില് നിന്ന് വ്യക്തമായെന്നാണ് പൊലീസ് പറയുന്നത്. സ്ഫോടക വസ്തുക്കള് കണ്ടെത്തിയതിന്റെ പശ്ചാത്തലത്തില് പ്രദേശത്ത് സുരക്ഷ ശക്തമാക്കിയിട്ടുണ്ട്. മുകേഷ് അംബാനിയുടെ വീടിനും സുരക്ഷ കൂട്ടിയിട്ടുണ്ട്.
4,00,000 ചതുരശ്രയടി വിസ്തീര്ണമുളളതാണ് മുകേഷ് അംബാനിയുടെ ദക്ഷിണ മുംബയിലെ ആന്റില. 27 നിലകളിലായാണുള്ളത് . 2012 മുതല് അംബാനിയും കുടുംബവും ഇവിടെയാണ് താമസിക്കുന്നത്. ലോകത്തിലെ തന്നെ ഏറ്റവും വിലപിടിപ്പുളള വീടുകളില് ഒന്നാണ് ഇത്
Discussion about this post