കാസര്‍കോട്: ഫേസ്ബുക്കില് ഇടതുമുന്നണിക്ക് അനുകൂലമായ ഫ്രെയിമില്‍ പ്രഫൈല്‍ ചിത്രം പങ്കുവെച്ചെന്ന പരാതിയില്‍ കാസര്‍കോട് പൊലീസ് സ്റ്റേഷനിലെ സബ് ഇന്‍സ്‌പെക്ടര്‍ ഷെയ്ഖ് അബ്ദുല്‍ റസാഖിനെതിരെ (54) കാസര്‍കോട് പൊലീസ് കേസെടുത്തു. തെരഞ്ഞെടുപ്പ് കമീഷന്‍ നിര്‍ദേശ പ്രകാരം ജനപ്രാതിനിധ്യ നിയമം 129 (2), (3) എന്നിവ പ്രകാരമാണ് എഫ്.ഐ.ആര്‍ രജിസ്റ്റര്‍ ചെയ്തിട്ടുള്ളത്. ഇന്ത്യന്‍ ലോയേഴ്സ് കോണ്‍ഗ്രസ് സെക്രട്ടറി അഡ്വ. ഷാജിദ് കമ്മാടത്തിന്റെ പരാതിയിലാണ് നടപടി. പോസ്റ്റിന്റെ സ്‌ക്രീന്‍ ഷോട്ട് സഹിതമാണ് പരാതി നല്‍കിയത്.
‘ചെ ഗുവേര ആര്‍മി’യില്‍ നിന്നുള്ള ‘ഉറപ്പാണ് എല്‍.ഡി.എഫ്’ എന്ന ഫ്രെയിമിലാണ് എസ്.ഐ സ്വന്തം പ്രഫൈല്‍ ചിത്രം ഫേസ്ബുക്കില് പോസ്റ്റ് ചെയ്തത്. തെരഞ്ഞെടുപ്പ് പെരുമാറ്റച്ചട്ടം നിലനില്‍ക്കെ, നിഷ്പക്ഷനായി സേവനം ചെയ്യേണ്ട പൊലീസ് ഉദ്യോഗസ്ഥന്‍ ഒരു രാഷ്ട്രീയപാര്‍ട്ടിക്ക് അനുകൂലമായി സാമൂഹിക മാധ്യമത്തില്‍ പ്രചാരണം നടത്തിയത് തെറ്റാണെന്ന് പരാതിയില്‍ പറയുന്നു. പരാതി ഉയര്‍ന്നതോടെ പൊലീസ് ഉദ്യോഗസ്ഥന്‍ പോസ്റ്റ് നീക്കം ചെയ്തിരുന്നു.
Discussion about this post