ബിജെപി സ്ഥാപക ദിനം; പ്രധാനമന്ത്രി ഇന്ന് പ്രവർത്തകരെ അഭിസംബോധന ചെയ്യും

ഡൽഹി: ഇന്ന് ബിജെപിയുടെ 41ആം സ്ഥാപക ദിനം. പ്രധാനമന്ത്രി നരേന്ദ്ര മോദി ഇന്ന് ബിജെപി പ്രവർത്തകരെ അഭിസംബോധന ചെയ്യും.

രാവിലെ 10.30ന് വീഡിയോ കോൺഫറൻസിംഗ് വഴി ആരംഭിക്കുന്ന യോഗത്തിൽ ബിജെപി ദേശീയ അധ്യക്ഷൻ ജെ പി നഡ്ഡയും പ്രവർത്തകരെ അഭിസംബോധന ചെയ്യും. കേരളം ഉൾപ്പെടെയുള്ള നാല് സംസ്ഥാനങ്ങളിലെയും പുതുച്ചേരിയിലെയും നിയമസഭാ തെരഞ്ഞെടുപ്പ് നടക്കുന്ന ദിവസമാണ് ഇത്തവണത്തെ ബിജെപി സ്ഥാപക ദിനം എന്നത് സവിശേഷതയാണ്.

ബിജെപി സ്ഥാപക ദിനത്തിന്റെ ഭാഗമായി വിപുലമായ പരിപാടികളാണ് രാജ്യമെമ്പാടും സംഘടിപ്പിച്ചിരിക്കുന്നത്. പാർട്ടിയുടെ ചരിത്രം, പരിണാമം, ആദർശം, ആശയങ്ങൾ എന്നിവ വിശദീകരിക്കുന്ന വെബിനാറുകൾ ബൂത്ത തലം മുതൽ ജില്ലാ സംസ്ഥാന തലങ്ങളിൽ വരെ സംഘടിപ്പിക്കും.

1951ൽ ശ്യാമപ്രസാദ് മുഖർജിയാണ് ഭാരതീയ ജനസംഘം സ്ഥാപിച്ചത്. പിന്നീട് 1977ൽ വിവിധ പാർട്ടികളുമായി ചേർന്ന് ജനത പാർട്ടി സ്ഥാപിക്കപ്പെട്ടു. ആർ എസ് എസിൽ പ്രവർത്തിക്കുന്നവർക്ക് ജനത പാർട്ടിയിൽ പ്രവർത്തിക്കാൻ സാധിക്കില്ല എന്ന നിബന്ധന 1980ൽ പാർട്ടിയുടെ ദേശീയ എക്സിക്യൂട്ടിവ് സമിതി നിർദ്ദേശിച്ചതോടെ ജനസംഘം അംഗങ്ങൾ പാർട്ടി വിടുകയും 1980 ഏപ്രിൽ ആറിന് ഭാരതീയ ജനതാ പാർട്ടി രൂപീകരിക്കപ്പെടുകയുമായിരുന്നു.