കൊൽക്കത്ത: നിയമസഭാ തെരഞ്ഞെടുപ്പിന്റെ പശ്ചാത്തലത്തിൽ കലാ-കായിക രംഗങ്ങളിൽ നിന്നുള്ള പ്രമുഖരുടെ ബിജെപിയിലേക്കുള്ള ഒഴുക്ക് തുടരുന്നു. പ്രമുഖ ഫുട്ബോൾ ക്ലബ്ബായ എടികെ മോഹന് ബഗാന് ഗോള് കീപ്പര് അരിന്ദം ഭട്ടാചാര്യ ബിജെപിയില് ചേര്ന്നു. ബിജെപി ഐടി സെല് മേധാവി അമിത് മാളവ്യയുടെയും പ്രമുഖ ചലച്ചിത്ര താരം മിഥുൻ ചക്രവർത്തിയുടെയും സാന്നിദ്ധ്യത്തിലായിരുന്നു താരത്തിന്റെ ബിജെപി പ്രവേശനം.
പശ്ചിമ ബംഗാളിൽ അഞ്ചാം ഘട്ട വോട്ടെടുപ്പിന് തൊട്ടുമുന്പാണ് അരിന്ദം ഭട്ടാചാര്യ ബിജെപി അംഗത്വം സ്വീകരിച്ചത്. പ്രധാനമന്ത്രി നരേന്ദ്ര മോദിയുടെ വലിയ ആരാധകനാണ് താനെന്നും അദ്ദേഹത്തോടൊപ്പം ചേര്ന്ന് പ്രവര്ത്തിക്കുകയെന്നത് ഏറെ നാളായുള്ള ആഗ്രഹമാണെന്നും പാര്ട്ടി അംഗത്വം സ്വീകരിക്കവെ അരിന്ദം ഭട്ടാചാര്യ പറഞ്ഞു.
ബംഗാൾ ജനത ഫുട്ബോളിലൂടെ തനിക്ക് വലിയ സ്നേഹവും ആദരവുമാണ് നൽകിയതെന്നും അതെല്ലാം തിരിച്ച് നല്കാനുള്ള അവസരമായി പാര്ട്ടി പ്രവേശനത്തെ കാണുന്നുവെന്നും അരിന്ദം ഭട്ടാചാര്യ പറഞ്ഞു. പ്രധാനമന്ത്രി നരേന്ദ്ര മോദിയുടെ നേതൃത്വത്തിൻ കീഴിൽ ധാരാളം കാര്യങ്ങള് ചെയ്യാനാകുമെന്നാണ് പ്രതീക്ഷയെന്നും അരിന്ദം ഭട്ടാചാര്യ വ്യക്തമാക്കി.
Discussion about this post