കോഴിക്കോട്: സബ് ഇന്‍സ്‌പെക്ടറെ വിഡ്ഢിയെന്നധിക്ഷേപിച്ച്‌ മൃഗത്തോടുപമിച്ച സംഭവത്തില്‍ ക്രമസമാധാന ചുമതല വഹിക്കുന്ന ഡെപ്യൂട്ടി പൊലീസ് കമ്മീഷണർ ഡിസിപി ഹേമലതയില്‍ നിന്ന് സിറ്റി പൊലീസ് മേധാവി എവി ജോര്‍ജ് വിശദീകരണം തേടി. ഇക്കഴിഞ്ഞ ഏപ്രില്‍ 13ന് രാവിലെയാണ് പരാതിക്കിടയാക്കിയ സംഭവം.
പതിവായി നടക്കുന്ന വയര്‍ലെസ് യോഗത്തിനിടെ കണ്‍ട്രോള്‍ റൂം സബ് ഇന്‍സ്‌പെക്ടറെ മേലുദ്യോഗസ്ഥ കടുത്ത ഭാഷയില്‍ അധിക്ഷേപിക്കുകയായിരുന്നു. ഫ് ളയിങ് സ്‌ക്വാഡിന്റെ എല്ലാ വാഹനങ്ങളിലും എസ് ഐ തലത്തിലുളള ഉദ്യോഗസ്ഥന്‍ വേണമെന്ന് നേരത്തെ നിര്‍ദേശിച്ചിരുന്നത് നടപ്പാവാത്തതാണ് ഡിസിപിയെ പ്രകോപിപ്പിച്ചത്. മൃഗത്തോടുപമിച്ചുള്ള ‘പരസ്യ ശാസന’ വയര്‍ലെസിലൂടെ യോഗത്തില്‍ പങ്കെടുത്ത മറ്റ് ഉദ്യോഗസ്ഥരെല്ലാം കേട്ടു. തെരഞ്ഞെടുപ്പ് ഡ്യൂട്ടിയിലായിരുന്ന പലരും അവധിയില്‍ പോയതിനാലാണ് പട്രോളിങ് വാഹനങ്ങളിലെല്ലാം എസ് ഐമാര്‍ വേണമെന്ന നിര്‍ദേശം പാലിക്കാനാകാതിരുന്നതെന്ന് ഇന്‍സ്‌പെക്ടര്‍ വിശദീകരിക്കാന്‍ ശ്രമിച്ചെങ്കിലും അത് കേള്‍ക്കാതെയായിരുന്നു ‘നിങ്ങള്‍ മൃഗങ്ങളാണോ നിങ്ങള്‍ക്ക് സാമാന്യ ബുദ്ധിയില്ലേ’ തുടങ്ങിയ കടുത്ത പ്രയോഗങ്ങള്‍ നടത്തിയുള്ള ഡിസിപിയുടെ ആക്രോശം.
പൊലീസുദ്യോഗസ്ഥരുടെ മനോവീര്യം തകര്‍ക്കുന്നതും ആത്മാഭിമാനം ചോദ്യം ചെയ്യുന്നതുമാണ് മേലുദ്യോഗസ്ഥയുടെ നടപടിയെന്ന് ചൂണ്ടിക്കാട്ടി സേനാംഗങ്ങളില്‍ പലരും വിമര്‍ശനവുമായി രംഗത്തെത്തിയതോടെ അസോസിയേഷന്‍ വിഷയത്തിലിടപെടുകയും പ്രശ്‌നം സിറ്റി പൊലീസ് മേധാവിയുടെ മുന്നില്‍ എത്തുകയുമായിരുന്നു. തുടര്‍ന്നാണ് ഡിസിപിയില്‍ നിന്ന് വിശദീകരണം തേടിയത്.
