ഡല്ഹി: കോവിഡ് വ്യാപനത്തിന്റെ പശ്ചാത്തലത്തിൽ കേന്ദ്ര സര്ക്കാര് ജീവനക്കാര്ക്ക് വര്ക്ക് ഫ്രം ഹോം തെരഞ്ഞെടുക്കാന് കേന്ദ്ര ആഭ്യന്തര മന്ത്രാലയം അനുമതി നൽകി. അണ്ടര് സെക്രട്ടറി മുതല് താഴെ തട്ടില് ജോലി ചെയ്യുന്നവര്ക്കാണ് വര്ക്ക് ഫ്രം ഹോമിന് അനുവാദം നല്കിയിരിക്കുന്നത്. ടെലിഫോണ് വഴിയോ മറ്റ് ഇലക്ട്രോണിക്സ് മാദ്ധ്യമങ്ങള് വഴിയോ ഇവര്ക്ക് വീട്ടില് ഇരുന്ന് ജോലി ചെയ്യാം. ഏപ്രില് 30 വരെ ഇത് തുടരാമെന്നാണ് ആഭ്യന്തര മന്ത്രാലയം വ്യക്തമാക്കിയിരിക്കുന്നത്.
ഡെപ്യൂട്ടി സെക്രട്ടറി മുതല് മുകളിലോട്ടുള്ളവര് പതിവായി ഓഫീസില് വരണമെന്നാണ് ആഭ്യന്തര മന്ത്രാലയത്തിന്റെ നിര്ദ്ദേശമെങ്കിലും, കണ്ടെയ്ന്മെന്റ് സോണില് നിന്ന് വരുന്നവര്ക്ക് ഓഫീസില് വരുന്നതില് ഇളവു നല്കും. കേന്ദ്ര സര്ക്കാര് സ്ഥാപനങ്ങളില് പതിവായി ഹാജരാകേണ്ട ജീവനക്കാരുടെ എണ്ണം 50 ശതമാനമായി കുറച്ചിട്ടുണ്ട്. ഭരണതലത്തില് കൂടുതല് ആളുകള് വേണമെന്ന് കണ്ടാല് വകുപ്പ് തലവന്മാര്ക്ക് നടപടി സ്വീകരിക്കാവുന്നതാണെന്നും നിദ്ദേശമുണ്ട്.
45 വയസിന് മുകളിലുള്ള കേന്ദ്ര സര്ക്കാര് ഉദ്യോഗസ്ഥര് വാക്സിന് സ്വീകരിച്ചുവെന്ന് ഉറപ്പാകാണാമെന്നും, വിവിധ ഷിഫ്റ്റുകള് എന്ന തരത്തില് സമയക്രമത്തില് മാറ്റം വരുത്തി ഒരേ സമയം ഓഫീസില് നിരവധി ജീവനക്കാര് വരുന്നത് ഒഴിവാക്കണമെന്നും മാർഗ്ഗനിര്ദേശത്തില് പറയുന്നു.
Discussion about this post