ബംഗളൂരു: ക്രിപ്റ്റോ കറന്സി ഇടപാടുമായി ബന്ധപ്പെട്ട് രണ്ട് യുവാക്കളെ തട്ടിക്കൊണ്ടുപോയി തടവില് പാര്പ്പിച്ച് മര്ദിക്കുകയും ബന്ധുക്കളെ ഫോണില് വിളിച്ച് ഭീഷണിപ്പെടുത്തുകയും ചെയ്ത കേസില് അഞ്ച് മലയാളികള് ഉള്പ്പെടെ ഏഴുപേരെ ഉള്ളാള് പൊലീസ് അറസ്റ്റ് ചെയ്തു. കാസര്കോട് സ്വദേശി ഷംസീര് (29), മഞ്ചേശ്വരം സ്വദേശികളായ യാക്കൂബ് (33), ഉമര് നൗഫല്(24), ഉപ്പള സ്വദേശികളായ മുഹമ്മദ് കൗസര് (41), ഷെയ്ഖ് മുഹമ്മദ് റിയാസ് (28), മംഗളൂരു അത്താവര് സ്വദേശികളായ അഹമ്മദ് ഇഖ്ബാല് (33), സി. നൗഷാദ് (28) എന്നിവരാണ് അറസ്റ്റിലായത്. പ്രതികളില്നിന്ന് മൂന്ന് കാര്, ഒരു ബൈക്ക്, 10 മൊബൈല് ഫോണുകള്,120 ഗ്രാം തൂക്കം വരുന്ന സ്വര്ണമാല, ആധാരം തുടങ്ങിയവ പൊലീസ് കണ്ടെടുത്തു
ഏപ്രില് 22ന് മംഗളൂരു കെ.സി. റോഡില്നിന്ന് അഹമ്മദ് അഷ്റഫ്, മഞ്ചേശ്വരം ഹൊസങ്കടിയില്നിന്ന് ഇയാളുടെ സുഹൃത്ത് ജാവേദ് എന്നിവരെ കാറുകളില് തട്ടിക്കൊണ്ടുപോയ സംഭവത്തിലാണ് അറസ്റ്റ്. യുവാക്കളെ തട്ടിക്കൊണ്ടുപോയി ഒരു വീട്ടില് പൂട്ടിയിട്ട് മർദിച്ച ശേഷം ബന്ധുക്കളെ ഫോണില് വിളിച്ച് പണവും രേഖകളും നല്കണമെന്നും ഇല്ലെങ്കില് രണ്ടുപേരെയും വധിക്കുമെന്നും ഭീഷണി മുഴക്കിയതായും മംഗളൂരു സിറ്റി പൊലീസ് കമ്മീഷണര് എന്. ശശികുമാര് പറഞ്ഞു.
യുവാക്കളെ കാണാനില്ലെന്ന ബന്ധുക്കളുടെ പരാതിയില് പൊലീസ് അന്വേഷണമാരംഭിച്ചതോടെ അഷ്റഫിനെയും ജാവേദിനെയും സംഘം തലപ്പാടിയില് ഉപേക്ഷിക്കുകയായിരുന്നു. ക്രിപ്റ്റോ കറന്സി ഇടപാടില് പ്രതീക്ഷിച്ച ലാഭം ലഭിക്കാത്തതുമായി ബന്ധപ്പെട്ട തര്ക്കമാണ് തട്ടിക്കൊണ്ടുപോകലില് കലാശിച്ചത്.
