മുംബൈ: മുതിര്‍ന്ന പൗരന്‍മാര്‍ക്ക് വാക്സിന്‍ നല്‍കുന്നതിന് ചുമതലയുള്ള സിവില്‍ ഉദ്യോഗസ്ഥ ചമഞ്ഞ് വീട്ടിലെത്തിയശേഷം വയോധികയെ കത്തിമുനയില്‍ നിര്‍ത്തി 3.10ലക്ഷം കവര്‍ന്നു. വോര്‍ളി സ്വദേശിയായ 74കാരിയില്‍നിന്നാണ് പണവും സ്വര്‍ണവും കവര്‍ന്നത്.
മകനും മരുമകളും ജോലിക്ക് പോയിരുന്നതിനാല്‍ 74 കാരിയായ സ്വാതി പട്ടീലും കൊച്ചുമകനും മാത്രമായിരുന്നു വീട്ടില്‍. ഉച്ച 12 മണിയോടെ സിവില്‍ ഉദ്യേഗസ്ഥയെന്ന് പരിചയപ്പെടുത്തി ഒരു സ്ത്രീ വീട്ടിലെത്തുകയായിരുന്നു. സ്വാതി പട്ടീല്‍ കോവിഡ് വാക്സിന്‍ സ്വീകരിച്ചതാണോയെന്ന് ആരാഞ്ഞശേഷം ചില നടപടിക്രമങ്ങള്‍ പൂര്‍ത്തീകരിക്കാനുണ്ടെന്ന് പറഞ്ഞ് വീട്ടിനകത്ത് പ്രവേശിക്കുകയായിരുന്നു.
വീട്ടിനകത്ത് പ്രവേശിച്ചതോടെ യുവതി കുടിക്കാന്‍ വെള്ളം ആവശ്യപ്പെട്ടു. വെള്ളം എടുക്കാന്‍ പോകാന്‍ തിരിഞ്ഞതോടെ സ്ത്രീ വയോധികയുടെ കഴുത്തില്‍ കത്തി വെക്കുകയായിരുന്നു. പിന്നീട് ഭീഷണിപ്പെടുത്തി സ്വര്‍ണവും പണവും കവര്‍ന്നു. പിന്നീട് വയോധികയെയും കൊച്ചുമകനെയും കെട്ടിയിട്ട ശേഷം സ്ഥലം വിടുകയായിരുന്നു.
പിന്നീട് സ്വാതി പട്ടീല്‍ ജനാലക്ക് സമീപത്ത് നിന്ന് സഹായത്തിനായി ഉറക്കെ കരഞ്ഞത് വഴിയാത്രക്കാരിലൊരാള്‍ കാണുകയും ഇരുവരെയും കെട്ടഴിച്ച്‌ വിടുകയും ചെയ്തു. തുടര്‍ന്ന് ഉടന്‍തന്നെ പൊലീസില്‍ വിവരം അറിയിക്കുകയായിരുന്നു.
കുടുംബത്തെക്കുറിച്ച്‌ നന്നായി അറിയാവുന്നയാളാണ് കവര്‍ച്ചക്ക് പിന്നിലെന്നാണ് പൊലീസ് നിഗമനം. വയോധികയും കൊച്ചുമകനും മാത്രമേ വീട്ടിലുണ്ടാകാറുള്ളുവെന്ന് മനസിലാക്കിയ ശേഷമാണ് അവര്‍ എത്തിയതെന്നും പൊലീസ് പറഞ്ഞു. പൊലീസ് അന്വേഷണം ആരംഭിച്ചു. പ്രദേശത്തെ സി.സി.ടി.വി ദൃശ്യങ്ങള്‍ പരിശോധിക്കാനൊരുങ്ങുകയാണ് പൊലീസ്.
