ഡല്ഹി: തദ്ദേശീയമായി ആറ് അത്യാധുനിക അന്തര്വാഹിനികള് നിര്മ്മിക്കാനുളള ഇന്ത്യന് പദ്ധതിക്ക് ഡിഫന്സ് കൗണ്സില് അംഗീകാരം നല്കി. അയല്രാജ്യങ്ങളായ ചൈനയും പാകിസ്ഥാനും നിരന്തരം രാജ്യസുരക്ഷയ്ക്ക് ഭീഷണിയാകുന്ന നടപടികള്ക്ക് ശ്രമിക്കുമ്പോഴാണ് പ്രതിരോധ രംഗത്ത് കൂടുതല് കരുത്ത് പകരുന്ന ഇന്ത്യയുടെ ഈ തീരുമാനം. 50,000 കോടി രൂപയാണ് പദ്ധതിച്ചിലവായി കണക്കാക്കുന്നത്.
2017-ല് എന്ഡിഎ സര്ക്കാര് രൂപീകരിച്ച ‘മേക്ക്ഇന്ഇന്ത്യ’ക്കു കീഴിലുളള ‘തന്ത്രപരമായ പങ്കാളിത്ത നയ’ത്തിന് കീഴിലുളള ആദ്യ പദ്ധതിയാണ് ഇത്. ‘പ്രൊജക്ട്75ഇന്ത്യ’ എന്ന് പേരിട്ടിരിക്കുന്ന പദ്ധതിക്ക് വേണ്ടി പ്രതിരോധ വകുപ്പിന്റെ ഷിപ്പ് യാര്ഡ് ആയ മസാഗോണ് ഡോക്ക്സിനും സ്വകാര്യ കപ്പല് നിര്മ്മാതാക്കളായ എല്&റ്റിയ്ക്കും നല്കേണ്ട ടെണ്ടറുകള് പ്രതിരോധമന്ത്രി രാജ്നാഥ് സിംഗ് നേതൃത്വം നല്കുന്ന ഡിഫന്സ് കൗണ്സില് അംഗീകരിച്ചു.
ടെണ്ടറുകള് ലഭിച്ചശേഷം മസാഗോണ് ഡോക്ക്സും എല്&റ്റിയും സംയുക്തമായി നേരത്തെതന്നെ തിരഞ്ഞെടുക്കപ്പെട്ട അഞ്ച് വിദേശ കപ്പല് നിര്മ്മാതാക്കളെ ബിഡുകള് സമര്പ്പിക്കുവാനായി ക്ഷണിക്കും. റഷ്യ,ജര്മനി,സ്പെയിന്,ദക്ഷിണകൊറിയ എന്നീ രാജ്യങ്ങളിലുളള ഈ കപ്പല് നിര്മ്മാതാക്കള് സമര്പ്പിക്കുന്ന ബിഡുകള് പരിശോധിച്ച ശേഷമാകും തുടര്ന്നുളള കാര്യങ്ങള് തീരുമാനിക്കുക.
ഏതാണ്ട് ഒരു വര്ഷത്തോളം നീണ്ടുനില്ക്കുന്ന നടപടിക്രമങ്ങളിലൂടെയാകും ബിഡ്നടപടികള് പൂര്ത്തിയാക്കുക എന്നും ഈ പദ്ധതിക്കു കീഴിലുളള ആദ്യ അന്തര്വാഹിനിയുടെ നിര്മ്മാണം പൂര്ത്തിയാക്കാന് ഏതാണ്ട് ഏഴുവര്ഷത്തോളം എടുക്കുമെന്നും അധികൃതരെ ഉദ്ധരിച്ച് ദേശീയമാദ്ധ്യമങ്ങള് റിപ്പോര്ട്ട് ചെയ്തു.
Discussion about this post