ഡൽഹി: രാജ്യത്ത് ഇതുവരെ വിതരണം ചെയ്തത് 31 കോടി വാക്സിൻ ഡോസുകളെന്ന് കേന്ദ്ര സർക്കാർ. ഇതിൽ 1.73 ഡോസുകൾ ആരോഗ്യ പ്രവർത്തകർക്കാണ് വിതരണം ചെയ്തതെന്ന് സർക്കാർ സുപ്രീം കോടതിയിൽ അറിയിച്ചു.
2.66 കോടി ഡോസുകൾ മുൻനിര ആരോഗ്യ പ്രവർത്തകർക്ക് നൽകി. 45നും 60നും ഇടയിൽ പ്രായമുള്ളവർക്ക് 9.93 കോടി ഡോസുകളും 60 വയസ്സിന് മുകളിലുള്ളവർക്ക് 8.96 കോടി ഡോസുകളും നൽകി.
18 മുതൽ 44 വയസ്സുവരെ പ്രായമുള്ളവർക്ക് 7.84 കോടി ഡോസ് വാക്സിനുകൾ നൽകി. 45 വയസ്സിന് മുകളിൽ പ്രായമുള്ള മുൻഗണനാ വിഭാഗത്തിലെ 44.2 ശതമാനം പേരും 18 മുതൽ 44 വയസ്സുവരെ പ്രായമുള്ള വിഭാഗത്തിലെ 13 ശതമാനം പേരും ഇതിനോടകം ആദ്യ ഡോസ് വാക്സിൻ സ്വീകരിച്ചതായും കേന്ദ്ര സർക്കാർ വ്യക്തമാക്കി.
സൈഡസ് കാഡില ഫാർമസ്യൂട്ടിക്കൽ കമ്പനി ഒരു പുതിയ വാക്സിൻ വികസിപ്പിച്ചതായി കേന്ദ്ര സർക്കാർ സുപ്രീം കോടതിയെ അറിയിച്ചു. 12 വയസ്സിനും 18 വയസ്സിനും ഇടയിൽ പ്രായമുള്ള കുട്ടികൾക്ക് ഈ വാക്സിൻ ഉടൻ വിതരണം ചെയ്ത് തുടങ്ങുമെന്നും സർക്കാർ അറിയിച്ചു.
