കാബൂള്: അഫ്ഗാനിസ്ഥാനിലെ പക്തിയ പ്രവിശ്യയിലെ ചരിത്ര പ്രസിദ്ധമായ ഗുരുദ്വാരയില് നിന്ന് സിഖ് മത പതാക താലിബാന് നീക്കം ചെയ്തതായി റിപ്പോര്ട്ട്. ഇതിന്റെ ദൃശ്യങ്ങള് സോഷ്യല്മീഡിയയിലൂടെ വ്യാപകമായി പ്രചരിക്കുന്നുണ്ടെങ്കിലും സര്ക്കാര് ഇക്കാര്യം സ്ഥിരീകരിച്ചിട്ടില്ല.
സംഭവത്തില് ഇന്ത്യ കടുത്ത ആശങ്ക പ്രകടിപ്പിക്കുകയും ന്യൂനപക്ഷങ്ങള് നേരിടുന്ന വെല്ലുവിളികള് അതിജീവിക്കാന് ശക്തമായ നടപടി സ്വീകരിക്കണമെന്ന് അഫ്ഗാന് സര്ക്കാരിനോട് ആവശ്യപ്പെടുകയും ചെയ്തിരുന്നു.
സിഖ് മതത്തിന്റെ സ്ഥാപകനും ആദ്യത്തെ സിഖ് ഗുരുവുമായ ഗുരുനാനാക്ക് ഇവിടം സന്ദര്ശിച്ചതിനെത്തുടര്ന്നാണ് ഗുരുദ്വാരയുടെ പ്രാധാന്യം വര്ദ്ധിച്ചത്. കഴിഞ്ഞവര്ഷം ഇതേ ഗുരുദ്വാരയില് നിന്ന് സിഖ് സമുദായ നേതാവായ നേദന് സിംഗിനെ താലിബാന് തട്ടിക്കൊണ്ടുപാേയിരുന്നു.
കഴിഞ്ഞ വര്ഷം മാര്ച്ചില് കാബൂളിലെ ഷോര് ബസാറിലെ ഗുരു ഹര് റായ് സാഹിബ് ഗുരുദ്വാരയില് ഒരു ഐസിസ് തോക്കുധാരി 25 സിഖുകാരെയാണ് കൂട്ടക്കൊല നടത്തിയത്. കഴിഞ്ഞവര്ഷത്തെ കണക്കനുസരിച്ച് അഫ്ഗാനിസ്ഥാനില് ഏകദേശം 650 സിഖുകാരാണ് ഉള്ളത്.
രാജ്യത്ത് പിടിമുറുക്കുന്ന താലിബാന് തങ്ങള്ക്ക് എതിരാണെന്ന് തോന്നുന്നതെല്ലാം നശിപ്പിച്ചാണ് മുന്നേറുന്നത്. അമേരിക്കന് ആക്രമണത്തിന് മുമ്പുള്ള താലിബാന് ഭരണത്തില് നിരവധി ചരിത്ര സ്മാരകങ്ങളാണ് നശിപ്പിക്കപ്പെട്ടത്. അഫ്ഗാനിസ്ഥാനിലെ ഇന്ത്യന് നിര്മ്മിതികള് തകര്ക്കാനാണ് താലിബാന് ഭീകര്ക്ക് പാകിസ്ഥാന് നല്കിയിരിക്കുന്ന രഹസ്യ നിര്ദ്ദേശം. അതിര്ത്തി കടന്ന് താലിബാനെ സഹായിക്കാന് പോകുന്ന പാകിസ്ഥാനികള്ക്കാണ് ഇതുസംബന്ധിച്ച് നിര്ദ്ദേശം നല്കിയിരിക്കുന്നത്. അതേസമയം, അഫ്ഗാനിസ്ഥാനില് ആധിപത്യം സ്ഥാപിക്കാനുള്ള താലിബാന്റെ ശ്രമങ്ങള് പ്രതീക്ഷിച്ചപോലെ വിജയത്തിലേക്ക് എത്തുന്നില്ല. സൈന്യത്തിനൊപ്പം ജനങ്ങളുടെ ചെറുത്തുനില്പ്പ് ശക്തമായതാണ് ഇതിനുള്ള പ്രധാന കാരണം.
Discussion about this post