ഡല്ഹി: പ്രതിരോധ വിദേശകാര്യ സഹകരണം വര്ദ്ധിപ്പിക്കുന്നതിന്റെ ഭാഗമായി ഓസ്ട്രേലിയയുമായി ഇന്ത്യ നടത്തുന്ന മന്ത്രിതല ചര്ച്ച ഇന്ന് ഡല്ഹിയില് നടക്കും. ഇത് ആദ്യമായാണ് ഓസ്ട്രേലിയയുമായി ഇന്ത്യ ഇത്തരത്തില് ചര്ച്ച നടത്തുന്നത്. ഇന്ത്യന് വിദേശകാര്യമന്ത്രി എസ്. ജയ്ശങ്കര്, പ്രതിരോധ മന്ത്രി രാജ്നാഥ് സിംഗ് എന്നിവരുമായി ഓസ്ട്രേലിയന് വിദേശകാര്യ മന്ത്രി മാറീസ് പെയ്ന്, പ്രതിരോധമന്ത്രി പീറ്റര് ഡട്ടണ് എന്നിവരാണ് ചര്ച്ച നടത്തുക.
രാവിലെ ദേശീയ യുദ്ധ സ്മാരകത്തില് പുഷ്പചക്രം അര്പ്പിച്ചതിന് ശേഷം പെയ്ന് ഹൈദരാബാദ് ഹൗസില് വച്ച് എസ് ജയശങ്കറുമായി കൂടിക്കാഴ്ച നടത്തി. വൈകുന്നേരം 3 മണിക്ക് ജവഹര്ലാല് നെഹ്റു ഭവനിലെ മുത്തമ്മ ഹാളില് നടക്കുന്ന പത്രസമ്മേളനത്തിലും പെയ്ന് പങ്കെടുക്കും.
വൈകുന്നേരം 4.30ന് പ്രധാനമന്ത്രി നരേന്ദ്ര മോദിയെ 7 ലോക് കല്യാണ് മാര്ഗിലുള്ള അദ്ദേഹത്തിന്റെ വസതിയില് വച്ച് ഓസ്ട്രേലിയന് മന്ത്രിമാര് സന്ദര്ശിക്കും. ഇരു രാജ്യങ്ങളുമായുള്ള സാമ്പത്തിക സുരക്ഷ, സൈബര് സുരക്ഷ, കാലാവസ്ഥ, സാങ്കേതികവിദ്യ, വിതരണ ശൃംഖല പ്രശ്നങ്ങള് തുടങ്ങിയ വിവിധ കാര്യങ്ങള്ചര്ച്ച ചെയ്യും. ഇന്തോ-പസഫിക് മേഖലയിലെ തന്ത്രപരമായ സഹകരണത്തിനാണ് ഇരു രാജ്യങ്ങളുടെയും ചര്ച്ച. കഴിഞ്ഞ ഒരു വര്ഷമായി നിലവിലുളള ഈ ബന്ധം ശക്തമായ പുരോഗതി കൈവരിച്ചതായി ഓസ്ട്രേലിയന് വിദേശകാര്യ മന്ത്രി മാറീസ് പെയ്ന് അഭിപ്രായപ്പെട്ടു.
ഇന്ത്യ ഒരു ആഗോള ഉല്പാദന കേന്ദ്രമാകുന്ന പാതയിലാണെന്നും സാങ്കേതിക വിദ്യയുടെ പ്രധാന വിപണിയായി ഇന്ത്യ മാറിയെന്നും മാറീസ് പെയ്ന് അറിയിച്ചു. വിവിധ ദുരന്തങ്ങളെ നേരിടുന്നതിനുളള അടിസ്ഥാന സൗകര്യങ്ങള് വികസിപ്പിക്കാനുളള ഇന്ത്യയുടെ സംരംഭത്തിന് 10 മില്യണ് ഡോളര് ഓസ്ട്രേലിയ നല്കുമെന്നും മന്ത്രിമാര് അറിയിച്ചു.
Discussion about this post