കാബൂള്‍: അഫ്ഗാനിസ്ഥാനിലെ കാണ്ഡഹാറില്‍ മുസ്ലീം പള്ളിയിലെ സ്ഫോടനത്തില് 32 പേര്‍ കൊല്ലപ്പെട്ടു. നിരവധി പേര്‍ക്ക് പരിക്കേറ്റു. ഷിയാ വിഭാഗത്തിന്റെ ബീബി ഫാത്തിമ പള്ളിയിൽ വെള്ളിയാഴ്ച ഉച്ചകഴിഞ്ഞുള്ള നമസ്കാരത്തിനു വേണ്ടി പള്ളിയില്‍ എത്തിയവരാണ് മരിച്ചവരെല്ലാം. വെള്ളിയാഴ്ച നമസ്കാരത്തിന് വന്‍ ജനക്കൂട്ടം പള്ളിയില്‍ ഉണ്ടായിരുന്നതായും മരണസംഖ്യ ഇനിയും ഉയരാന്‍ സാദ്ധ്യതയുള്ളതായി താലിബാന്‍ വക്താവ് വെളിപ്പെടുത്തി. സംഭവവുമായി ബന്ധപ്പെട്ട് അന്വേഷണം നടക്കുകയാണെന്നും വക്താവ് മാദ്ധ്യമങ്ങളോട് പറഞ്ഞു.
പള്ളിയിലും സമീപ്രദേശങ്ങളിലുമായി മൂന്ന് സ്ഫോടനങ്ങള്‍ നടന്നതായി ദൃക്സാക്ഷികള്‍ പറഞ്ഞു. ആദ്യത്തേത് പള്ളിയുടെ വാതിലിനു സമീപത്തായും രണ്ടാമത്തേത് പള്ളിയുടെ ദക്ഷിണ ഭാഗത്തായും മൂന്നാമത്തെ സ്ഫോടനം വിശ്വാസികള്‍ കൈകഴുകുന്ന സ്ഥലത്തുമായാണ് നടന്നത്. ആക്രമണത്തിന്റെ ഉത്തരവാദിത്വം ഇതുവരെയായും ആരും ഏറ്റെടുത്തിട്ടില്ല. കഴിഞ്ഞ ആഴ്ച അഫ്ഗാനിസ്ഥാനിലെ തന്നെ കുണ്ഡുസിലെ സെയ്ദ് അബാദ് പള്ളിയില്‍ നടന്ന സ്ഫോടനത്തില് 50 പേര്‍ കൊല്ലപ്പെട്ടിരുന്നു.
Discussion about this post