കുമ്മനം രാജശേഖരന് കൊവിഡ്

തിരുവനന്തപുരം: മിസോറം മുൻ ഗവർണറും ബിജെപി നേതാവുമായ കുമ്മനം രാജശേഖരന് കൊവിഡ് സ്ഥിരീകരിച്ചു. ഫേസ്‌ബുക്ക് പോസ്റ്റിലൂടെ അദ്ദേഹം തന്നെയാണ് ഇക്കാര്യം വെളിപ്പെടുത്തിയത്. മറ്റ് ലക്ഷണങ്ങൾ ഒന്നുമില്ലെന്നും ഇപ്പോൾ വിശ്രമത്തിലാണെന്നും അദ്ദേഹം പറഞ്ഞു.

താനുമായി സഹകരിച്ചവർ നിരീക്ഷണത്തിൽ പോകണമെന്നും കോവിഡ് പടരുന്ന സാഹചര്യത്തിൽ എല്ലാവരും മാസ്ക് ധരിക്കണമെന്നും വേണ്ട സുരക്ഷാ നടപടികൾ അനുസരിക്കണമെന്നും കുമ്മനം അഭ്യർത്ഥിച്ചു.

അതേസമയം സംസ്ഥാനത്ത് കൊവിഡ് വ്യാപനം അതിരൂക്ഷമാണ്. ഇന്ന് 28,481 പേർക്കാണ് കൊവിഡ് സ്ഥിരീകരിച്ചത്. തിരുവനന്തപുരത്ത് ആറായിരത്തിന് മുകളിലാണ് ഇന്നത്തെ രോഗബാധ. കൂടാതെ 122 കൊവിഡ് മരണങ്ങളും സംസ്ഥാനത്ത് ഇന്ന് രേഖപ്പെടുത്തി.  ഇതോടെ സംസ്ഥാനത്തെ ആകെ മരണം 51,026 ആയി.

ഇന്ന് രോഗം സ്ഥിരീകരിച്ചവരിൽ 27,522 പേർക്ക് സമ്പർക്കത്തിലൂടെയാണ് രോഗം ബാധിച്ചത്. 579 പേരുടെ സമ്പർക്ക ഉറവിടം വ്യക്തമല്ല. 215 ആരോഗ്യ പ്രവർത്തകർക്കാണ് രോഗം ബാധിച്ചത്.

https://www.facebook.com/kummanam.rajasekharan/posts/4540432329399852