ബാലസോര്‍: ബ്രഹ്മോസ് സൂപ്പര്‍സോണിക് ക്രൂസ് മിസൈലിന്‍റെ പരിഷ്‌കരിച്ച പതിപ്പ് വീണ്ടും വിജയകരമായി പരീക്ഷിച്ചു. ഒഡീഷയിലെ ടെസ്റ്റ് റേഞ്ചില്‍ നിന്നാണ് മിസൈല്‍ പരീക്ഷിച്ചത്. മിസൈലില്‍ വരുത്തിയ പുതിയ സാങ്കേതികമാറ്റങ്ങളുടെ കൃത്യത ഉറപ്പുവരുത്തുന്നതിനാണ് പരീക്ഷണം നടത്തിയതെന്ന് പ്രതിരോധ വൃത്തങ്ങള്‍ അറിയിച്ചു.
ശബ്ദത്തിന്‍റെ ഏഴിരട്ടി വേഗത്തില്‍ സഞ്ചരിക്കുന്ന സൂപ്പര്‍ സോണിക് ക്രൂസ് മിസൈലാണ് ബ്രഹ്മോസ്. മിസൈലിന് മണിക്കൂറില്‍ 3200 കിലോമീറ്ററാണ് വേഗം. 290 കിലോമീറ്റര്‍ ദൂരത്തുള്ള ശത്രുകേന്ദ്രത്തെ തകര്‍ക്കാന്‍ ശേഷിയുള്ള ബ്രഹ്മോസിന്‍റെ കര, കടല്‍, ആകാശ പതിപ്പുകളുടെ പരീക്ഷണം വിജയകരമായിരുന്നു.
ജനുവരി 12ന് നടന്ന ബ്രഹ്മോസ് മിസൈലിന്‍റെ കടലില്‍ നിന്ന് കടലിലേക്ക് വിക്ഷേപിക്കാവുന്ന പരിഷ്‌കരിച്ച പതിപ്പിന്‍റെ പരീക്ഷണവും വിജയകരമായിരുന്നു. കപ്പലിന്‍റെ യുദ്ധ സംവിധാനത്തിന്‍റെയും ആയുധ സമുച്ചയത്തിന്‍റെയും കൃത്യത സാക്ഷ്യപ്പെടുത്തുന്നതാണ് പരീക്ഷണ വിജയം.
റഡാര്‍ ചക്രവാളത്തിനപ്പുറമുള്ള കടലില്‍ നിന്നുള്ള ലക്ഷ്യങ്ങള്‍ തകര്‍ക്കാന്‍ ശേഷിയുള്ള ബ്രഹ്മോസ് 2005 മുതലാണ് നാവികസേന മുന്‍നിര യുദ്ധക്കപ്പലുകളില്‍ വിന്യസിക്കാന്‍ തുടങ്ങിയത്.
Discussion about this post