ഡല്‍ഹി: ഉക്രെയിനിലെ ഇന്ത്യക്കാരെ ഒഴിപ്പിക്കുന്ന ഓപ്പറേഷന്‍ ഗംഗ അവസാന ഘട്ടത്തിലാണെന്നും ശേഷിക്കുന്ന വിദ്യാര്‍ത്ഥികള്‍ ഉടന്‍ രജിസ്റ്റര്‍ ചെയ്യണമെന്നും ഉക്രെയിനിലെയും ഹംഗറിയിലെയും ഇന്ത്യന്‍ എംബസികള്‍ അറിയിച്ചു.
സ്വന്തം നിലയില്‍ താമസിക്കുന്ന വിദ്യാര്‍ത്ഥികള്‍ പ്രാദേശിക സമയം 10 നും 12 നുമിടയില്‍ ഹംഗറി തലസ്ഥാനമായ ബുഡാപെസ്റ്റിലെ ഹംഗേറിയ സിറ്റി സെന്ററില്‍ എത്താനാണ് നിര്‍ദ്ദേശം. യുദ്ധ മേഖലകളില്‍ കുടുങ്ങിയവര്‍ സ്ഥിതി വിവരിച്ച്‌ ലൊക്കേഷന്‍ ഉള്‍പ്പെടുത്തി ഒരു ഗൂഗിള്‍ ഫോം പൂരിപ്പിച്ച്‌ നല്‍കണം.
സ്ഥിതി രൂക്ഷമായ സുമിയിലെ ഇന്ത്യക്കാരെ ഒഴിപ്പിക്കാനാണ് ഇനി മുന്‍ഗണനയെന്ന് വിദേശ മന്ത്രാലയ വക്താവ് അരിന്ദം ബാഗ്ചി പറഞ്ഞു. ഇവിടെ യാത്രാ സൗകര്യം ലഭ്യമല്ല. ഒഴിപ്പിക്കല്‍ ബസുകള്‍ തയ്യാറാക്കാന്‍ കഴിയുന്നില്ല. രക്ഷാദൗത്യം വലിയ വെല്ലുവിളിയാണ്. 700 പേരാണ് സുമിയിലുള്ളതെന്നാണ് കണക്ക്. ഖാര്‍കീവില്‍ വെടിനിര്‍ത്തല്‍ പ്രഖ്യാപിച്ചാല്‍ രക്ഷാദൗത്യം തുടങ്ങും. അതുവരെ വിദേശ മന്ത്രാലയം നല്‍കിയ സുരക്ഷാ നിര്‍ദ്ദേശങ്ങള്‍ പാലിച്ച്‌ ക്ഷമയോടെ കാത്തിരിക്കണമെന്നും എംബസി അറിയിച്ചു.
അടുത്ത 24 മണിക്കൂറില്‍ 13 വിമാനങ്ങള്‍ ഇന്ത്യക്കാരുമായി എത്തും. ഇതുവരെ ഓപ്പറേഷന്‍ ഗംഗയില്‍ 63 വിമാനങ്ങളിലായി 13,300 വിദ്യാര്‍ത്ഥികള്‍ തിരിച്ചെത്തി. കഴിഞ്ഞ 24 മണിക്കൂറില്‍ 15 വിമാനങ്ങളില്‍ 2,900 പേര്‍ തിരിച്ചെത്തി. ആകെ 21,000 പേരെയാണ് രക്ഷിച്ചത്. ഏറ്റവും പ്രതിസന്ധി സൃഷ്ടിച്ച ഹാര്‍കിവിലെ എല്ലാ ഇന്ത്യക്കാരെയും ഒഴിപ്പിച്ചു. യുക്രെയിനില്‍ ഇനി എത്ര ഇന്ത്യക്കാര്‍ ഉണ്ടെന്ന് നിരീക്ഷിക്കുകയാണ്. ഓപ്പറേഷന്‍ ഗംഗയില്‍ രജിസ്റ്റര്‍ ചെയ്യാത്തവരെ എംബസി നേരിട്ട് ബന്ധപ്പെടും. നേപ്പാള്‍, ബംഗ്ലാദേശ് സ്വദേശികളായ രണ്ട് പേരെ ഇന്നലെ ഇന്ത്യയിലെത്തിച്ചു. കഴിഞ്ഞ ദിവസവും ഒരു ബംഗ്ലാദേശ് പൗരനെ ഒഴിപ്പിച്ചു.
Discussion about this post