ഡൽഹി: ഭർത്താവുമായി വഴക്കിട്ട യുവതി പിഞ്ചു കുഞ്ഞിനെ കൊലപ്പെടുത്തി. പടിഞ്ഞാറൻ ഡൽഹിയിലെ ഹൈദർപൂർ സ്വദേശിനിയായ 26 വയസ്സുകാരിയാണ് മൂന്ന് മാസം പ്രായമുള്ള പെൺകുഞ്ഞിനെ കഴുത്തു ഞെരിച്ച് കൊലപ്പെടുത്തിയത്. ഇവർ താമസിക്കുന്ന വാടക വീട്ടിലായിരുന്നു സംഭവം.
കുടുംബവഴക്കിന്റെ പേരിൽ അഞ്ജലി ദേവി എന്ന യുവതിയാണ് നീചകൃത്യം ചെയ്തത്. സ്വകാര്യ സ്ഥാപനത്തിലെ ജീവനക്കാരനായ സഞ്ജീത് ആണ് ഇവരുടെ ഭർത്താവ്. കുട്ടിയുടെ കഴുത്തിൽ കുരുക്കിട്ട് വരിഞ്ഞു മുറുക്കിയാണ് ഇവർ കൊലപാതകം ചെയ്തത്.
എന്നാൽ കൊലക്കുറ്റം പൊലീസിനോട് ഇവർ നിഷേധിച്ചു. കുരുക്ക് അബദ്ധത്തിൽ കുഞ്ഞിന്റെ കഴുത്തിൽ മുറുകിയതാണ് എന്നാണ് ഇവർ പറഞ്ഞത്. ഒരു വർഷമായി ബിഹാറിലെ വീട്ടിൽ മാതാപിതാക്കൾക്കൊപ്പം കഴിഞ്ഞിരുന്ന അഞ്ജലി അടുത്തിടെയാണ് ഡൽഹിയിലേക്ക് മടങ്ങി വന്നതെന്ന് പൊലീസ് പറഞ്ഞു.
