തിരുവനന്തപുരം: കെ-ഫോണ് ബിപിഎല് വിഭാഗത്തിന് സൗജന്യമെന്ന് മുഖ്യമന്ത്രി പിണറായി വിജയന് നിയമസഭയില് വ്യക്തമാക്കി. തദ്ദേശ വകുപ്പിനെ കെ-ഫോണ് ഗുണഭോക്തൃ പട്ടിക തയാറാക്കുന്നതിനായി ചുമതലപ്പെടുത്തിയിട്ടുണ്ട്. ആദ്യം ബിപിഎല് വിഭാഗത്തിന് നല്കുകയാണ് ലക്ഷ്യം.
സംസ്ഥാനത്ത് നിലവില് പ്രവര്ത്തിക്കുന്ന എല്ലാ റേഷന് കടകളും നവീകരിക്കാന് ഒരുങ്ങുകയാണ് സര്ക്കാര്. റേഷന് കടകളെ കെ-സ്റ്റോര് എന്നാക്കി മാറ്റും. റേഷന് വിതരണവും നിത്യോപയോഗ സാധനങ്ങളും ഇതുവഴി വില്ക്കുന്ന തരത്തിലാകും പുതിയ നവീകരണമെന്നും മുഖ്യമന്ത്രി പറഞ്ഞു. ലൈഫ് മിഷന് വഴി ഇതിനോടകം മൂന്ന് ലക്ഷത്തിലധികം വീടുകള് പൂര്ത്തിയാക്കാനായി. അര്ഹതയുള്ളവര്ക്കെല്ലാം വീട് നല്കാനാണ് സര്ക്കാര് ലക്ഷ്യമിടുന്നത്. കൊല്ലം-ചെങ്കോട്ട ദേശീയപാതയുടെ വികസന പ്രവര്ത്തനങ്ങള് പുരോഗമിച്ചു വരികയാണ്, ഒന്നിച്ചു നിന്നാല് അസാധ്യമായി ഒന്നുമില്ലെന്നും പിണറായി വിജയന് വ്യക്തമാക്കി.
വിസര്ജ്യം കലര്ന്ന വെള്ളമാണ് കേരളത്തിലേത്. ഈ സ്ഥിതിവിശേഷം മാറണമെന്നും മാലിന്യ നിര്മാര്ജ്ജന പദ്ധതി എവിടെ നടപ്പാക്കിയാലും എതിര്പ്പുണ്ടെന്നും അദ്ദേഹം എടുത്തുപറയുകയുണ്ടായി. പെരിങ്ങമലയില് പ്രതിഷേധത്തെ തുടര്ന്ന് മാലിന്യ പ്ലാന്റ് ഉപേക്ഷിക്കേണ്ടി വന്നു. മാലിന്യ പ്ലാന്റ് വേണ്ടെന്ന് ജനം തീരുമാനിക്കുന്ന അവസ്ഥ ശരിയല്ല, സഹകരിക്കുകയാണ് വേണ്ടത്, മുഖ്യമന്ത്രി നിയമസഭയില് പറഞ്ഞു.
