ന്യൂഡെല്ഹി: ഇന്ത്യയുടെ കരുത്ത് ലോകമൊന്നാകെ പ്രദര്ശിപ്പിക്കുന്നതിനുള്ള അതുല്യ അവസരമാണ് ജി-20യുടെ അധ്യക്ഷസ്ഥാനമെന്ന് പ്രധാനമന്ത്രി നരേന്ദ്രമോദി. ഈ അവസരത്തില് ഒറ്റക്കെട്ടായ പ്രവര്ത്തനം അനിവാര്യമാണെന്നും വിവിധ ജി-20 പരിപാടികളില് എല്ലാ നേതാക്കളും സഹകരിക്കണമെന്നും പ്രതിപക്ഷ നേതാക്കളടക്കം പങ്കെടുത്ത സര്വ്വകക്ഷി യോഗത്തില് പ്രധാനമന്ത്രി ആവശ്യപ്പെട്ടു.
ലോകത്തിലെ പ്രധാനപ്പെട്ട 20 സമ്പദ് വ്യവസ്ഥകളുടെ കൂട്ടായ്മയായ ജി-20യുടെ അധ്യക്ഷസ്ഥാനം മുഴുവന് രാജ്യത്തിനും ഉള്ളതാണെന്ന് വ്യക്തമാക്കിയ പ്രധാനമന്ത്രി, ഇന്ന് ലോകം മുഴുവന് ഇന്ത്യയെ ആകാംക്ഷയോടെയാണ് നോക്കിക്കാണുന്നതെന്നും അത് മികച്ച ഒരു അവസരമാണെന്നും പറഞ്ഞു. വമ്പന് മെട്രോ നഗരങ്ങള്ക്കുപരിയായി, ഇന്ത്യയുടെ വിവിധ ഭാഗങ്ങള് ലോകത്തിന് മുമ്പില് പ്രദര്ശിപ്പിക്കാനും അങ്ങനെ രാജ്യത്തെ വിവിധയിടങ്ങളുടെ പ്രത്യേകതകള് ലോകമറിയാനും ജി-20 അധ്യക്ഷസ്ഥാനത്തിലൂടെ കഴിയുമെന്നും പ്രധാനമന്ത്രി പറഞ്ഞതായി ആഭ്യന്തര മന്ത്രാലയം പ്രസ്താവനയിലൂടെ അറിയിച്ചു.
ഒരു വര്ഷം നീണ്ടുനില്ക്കുന്ന വിവിധ ജി-20 പരിപാടികളില് പങ്കെടുക്കന്നതിനായി നിരവധിയാളുകള് ഇന്ത്യയിലെത്തുമെന്നതിനാല് ടൂറിസവും പ്രാദേശിക സമ്പദ് വ്യവസ്ഥകളും ശക്തിപ്പെടുത്താനുള്ള മികച്ച അവസരം കൂടിയാണിതെന്നും പ്രധാനമന്ത്രി ഓര്മ്മിപ്പിച്ചു.
ബിജെപി അധ്യക്ഷന് ജെ പി നദ്ദ, കോണ്ഗ്രസ് നേതാവ് മല്ലികാര്ജ്ജുന് ഖാര്ഗെ, തൃണമൂല് കോണ്ഗ്രസ് നേതാവ് മമത ബാനര്ജി, എഎപി നേതാവ് അരവിന്ദ് കെജ്രിവാള്, വൈഎസ്ആര് കോണ്ഗ്രസ് നേതാവ് ജഗന് മോഹന് റെഡ്ഡി, സിപിഎമ്മിലെ സീതാറാം യെച്ചൂരി, റ്റിടിപി നേതാവ് ചന്ദ്രബാബു നായിഡു, ഡിഎംകെ നേതാവ് എം കെ സ്റ്റാലിന് എന്നിവരടക്കം രാജ്യത്തെ വിവിധ രാഷ്ട്രീയ പാര്ട്ടികളിലെ നേതാക്കള് പ്രധാനമന്ത്രി ഒരുക്കിയ ചായ സല്ക്കാരത്തില് പങ്കെടുത്തതായി ആഭ്യന്തര മന്ത്രാലയം അറിയിച്ചു.
