ഷിംല: ഹിമാചല്‍ പ്രദേശില്‍ കനത്ത പോരാട്ടത്തിനൊടുവില്‍ കോണ്‍ഗ്രസ് അധികാരത്തിലെത്തുമെന്ന് ഏറെക്കുറെ ഉറപ്പായെങ്കിലും വിജയ പ്രഖ്യാപനത്തിന് മുമ്പേ മുഖ്യമന്ത്രി ആരാകണമെന്നതില്‍ പോര് തുടങ്ങിയിരിക്കുകയാണ് കോണ്‍ഗ്രസില്‍. സംസ്ഥാന കോണ്‍ഗ്രസിലെ കരുത്തനായ നേതാവ്, കഴിഞ്ഞ വര്‍ഷം അന്തരിച്ച വീര്‍ഭദ്ര സിംഗിന്റെ ഭാര്യ പ്രതിഭ സിംഗിനെ മുഖ്യമന്ത്രി ആക്കണമെന്ന ആവശ്യം മുന്നോട്ട് വെച്ചിരിക്കുകയാണ് മകനും എംഎല്‍എയുമായ വിക്രമാദിത്യ സിംഗ്. പ്രതിഭ സിംഗിനെ കൂടാതെ, സുഖ്‌വിന്ദര്‍ സുഖു, മുകേഷ് അഗ്നിഹോത്രി എന്നിവരും മുഖ്യമന്ത്രി പദത്തിനായി രംഗത്തുണ്ട്.
ഒരു മകനെന്ന നിലയില്‍ പ്രതിഭ ജിയ്ക്ക് ആ വലിയ ഉത്തരവാദിത്തം കിട്ടണമെന്നാണ് താന്‍ ആഗ്രഹിക്കുന്നതെന്ന് വിക്രമാദിത്യ സിംഗ് മാധ്യമങ്ങളോട് പറഞ്ഞു. എന്നാല്‍ മകന്‍ എന്നതിലപ്പുറം താന്‍ പാര്‍ട്ടിയുടെ ഉത്തരവാദിത്തത്തപ്പെട്ട നേതാവാണെന്നും അതിനാല്‍ പാര്‍ട്ടിയുടെ ഏത് തീരുമാനവും അംഗീകരിക്കുമെന്നും അദ്ദേഹം പറഞ്ഞു. ഇത്തവണയും ഷിംല മണ്ഡലത്തില്‍ വിജയം നേടിയ വിക്രമാദിത്യ സിംഗ് വിജയം പിതാവിന് സമര്‍പ്പിച്ചു. വീര്‍ഭദ്ര സിംഗ് വികസന മാതൃകയിലായിരിക്കും സര്‍ക്കാര്‍ പ്രവര്‍ത്തിക്കുകയെന്നും അദ്ദേഹം പറഞ്ഞു.
നിലവില്‍ മണ്ഡിയില്‍ നിന്നുള്ള ലോക്‌സഭാംഗമാണ് സംസ്ഥാനത്തെ പാര്‍ട്ടി അധ്യക്ഷ കൂടിയായ പ്രതിഭ സിംഗ്. വീര്‍ഭദ്ര സിംഗിന്റെ മരണത്തെ തുടര്‍ന്ന് ഒഴിവ് വന്ന സീറ്റിലാണ് പ്രതിഭ സിംഗ് മത്സരിച്ച് ജയിച്ചത്.
പ്രതിഭ സിംഗിനെ കൂടാതെ, നിലവില്‍ പ്രതിപക്ഷ നേതാവായ സുഖ്‌വീന്ദര്‍ സുഖു, മുകേഷ് അഗ്നിഹോത്രി എന്നിവരും മുഖ്യമന്ത്രി പദത്തിനായി മത്സരരംഗത്തുണ്ട്. അതിനാല്‍ തന്നെ മധ്യപ്രദേശിലേത് പോലെ ഹിമാചല്‍ പ്രദേശിലും ഓപ്പറേഷന്‍ താമര സംഭവിക്കുമോ എന്ന ഭയം കോണ്‍ഗ്രസിനുണ്ട്. ജയിച്ച എംഎല്‍എമാരെ ചണ്ഡിഗഢിലേക്ക് മാറ്റുമെന്നാണ് പാര്‍ട്ടി നിരീക്ഷകനായ രാജീവ് ശുക്ല നല്‍കുന്ന സൂചന.
പാര്‍ട്ടി എംഎല്‍എമാരുമായി കൂടിയാലോചിച്ച് മുഖ്യമന്ത്രി ആരാകണമെന്ന കാര്യത്തില്‍ ഹൈക്കമാന്‍ഡ് തീരുമാനമെടുക്കുമെന്ന സ്ഥിരം കോണ്‍ഗ്രസ് പല്ലവിയാണ് ശുക്ല ആവര്‍ത്തിച്ചത്.
Discussion about this post