ചണ്ഡീഗഢ്; കശ്മീരിലെ ഭീകരാക്രമണവുമായി ബന്ധപ്പെട്ട നാല് ഭീകരരുടെ വിവരങ്ങൾ നൽകുന്നവർക്ക് എൻഐഎ പാരിതോഷികം പ്രഖ്യാപിച്ചു. പാകിസ്താൻ ആസ്ഥാനമായുള്ള രണ്ട് ഭീകരർ ഉൾപ്പെടെ നാലുപേരെ കുറിച്ചുള്ള വിവരങ്ങളാണ് എൻഐഎ തേടുന്നത്. ദ റെസിസ്റ്റൻസ് ഫ്രണ്ടും (ടിആർഎഫ്) ലഷ്കറുമായും ബന്ധമുള്ളവരാണ് നാല് ഭീകരരെന്നും എൻഐഎ കണ്ടെത്തിയിട്ടുണ്ട്.
അബു സാദ് എന്ന സലീം റഹ്മാനി, കസൂരിലെ ഷംഗമംഗയിലെ സൈഫുള്ള സാജിദ് ജാട്ട്, ശ്രീനഗർ എച്ച്എംടിയിലെ സജ്ജാദ് ഗുൽ, റെഡ്വാനി പയീനിലെ ബാസിത് അഹമ്മദ് ദർ എന്നിവരെക്കുറിച്ചുള്ള വിവരങ്ങളാണ് എൻഐഎ തേടുന്നത്. വിവരങ്ങൾ നൽകാൻ കശ്മീരിലെ കുൽഗാം ജില്ലയിലെ വിവിധ സ്ഥലങ്ങളിൽ പോസ്റ്ററുകൾ പതിച്ചിട്ടുണ്ട്. .
വിവരം നൽകുന്നവർക്ക് 10 ലക്ഷം രൂപയാണ് പാരിതോഷികം പ്രഖ്യാപിച്ചത്. ഫോൺ വാട്ട്സ്ആപ്പിലോ ടെലിഗ്രാമിലോ വിവരങ്ങൾ നൽകാനാണ് എൻഐഎ ആവശ്യപ്പെടുന്നത്. വിവരം നൽകുന്നവരുടെ പേരുവിവരങ്ങൾ രഹസ്യമായി സൂക്ഷിക്കുമെന്നും എൻഐഎ അറിയിച്ചു.
