ന്യൂഡെല്‍ഹി: രാജ്യത്ത് വനിതകള്‍ക്കും ഇനി കമാന്‍ഡോകളാകാം. രാജ്യത്തെ മൂന്ന് സേനാ വിഭാഗങ്ങളില്‍, ചരിത്രത്തില്‍ ആദ്യമായി പ്രത്യേക സേനകളില്‍ വനിതകള്‍ക്ക് കമാന്‍ഡോകളാകാന്‍ അവസരം നല്‍കുകയാണ് ഇന്ത്യന്‍ നാവികസേന. സംഭവുമായി ബന്ധമുള്ള വൃത്തങ്ങളെ ഉദ്ധരിച്ച് ഹിന്ദുസ്ഥാന്‍ ടൈംസ് ആണ് ഈ വാര്‍ത്ത റിപ്പോര്‍ട്ട് ചെയ്തിട്ടുള്ളത്.
കഠിനമായ പരിശീലനങ്ങള്‍ ലഭിച്ചിട്ടുള്ള, നിരോധിത അതിര്‍ത്തി മേഖലകളില്‍ അതിവേഗത്തില്‍ വളരെ ശക്തമായ പ്രതിരോധ നീക്കങ്ങള്‍ നടത്താന്‍ കെല്‍പ്പുള്ള ഏറ്റവും ശക്തരായ സൈനികരെയാണ് രാജ്യത്തെ കര, നാവിക, വ്യോമ സേനകളിലെ പ്രത്യേക സേനകളില്‍ നിയമിച്ചിട്ടുള്ളത്. ഈ സ്ഥാനത്തേക്ക് വനിതകളെയും പരിഗണിക്കാനുള്ള തീരുമാനം വനിത ശാക്തീകരണത്തിന് രാജ്യം നല്‍കുന്ന പ്രാധാന്യത്തിന്റെ ഏറ്റവും വലിയ ഉദാഹരണമാണ്.
നാവികസേനയിലെ യോഗ്യരായ വനിതകള്‍ക്ക്, അവര്‍ക്ക് താല്‍പ്പര്യം ഉണ്ടെങ്കില്‍ മറൈന്‍ കമാന്‍ഡോകള്‍ (മാര്‍കോസ്) ആകാമെന്നും ഇന്ത്യയുടെ സേനചരിത്രത്തില്‍ ഈ തീരുമാനം പുതിയൊരു നാഴികകല്ലായിരിക്കുമെന്നും പേര് വെളിപ്പെടുത്താന്‍ ആഗ്രഹിക്കാത്ത മുതിര്‍ന്ന നാവികസേന ഉദ്യോഗസ്ഥനെ ഉദ്ധരിച്ച് ഹിന്ദുസ്ഥാന്‍ ടൈംസ് റിപ്പോര്‍ട്ട് ചെയ്തു. അതേസമയം ആരെയും പ്രതേക സേന യൂണിറ്റുകളിലേക്ക് നേരിട്ട് നിയമിക്കില്ലെന്നും സ്വയം സന്നദ്ധരായി എത്തുന്ന വനിതകള്‍ക്കായിരിക്കും അതിന് അവസരമെന്നും ഉദ്യോഗസ്ഥന്‍ വ്യക്തമാക്കി.
അടുത്ത വര്‍ഷം അഗ്നിവീര്‍ പദവിയില്‍ സേനയില്‍ പ്രവേശിക്കുന്ന വനിതകള്‍ക്കും നാവികസേനാംഗങ്ങള്‍ക്കും ആയിരിക്കും മാര്‍കോസ് ആകാനുള്ള അവസരമെന്ന് മറ്റൊരു ഉദ്യോഗസ്ഥനും അറിയിച്ചു.
Discussion about this post