തിരുവനന്തപുരം: ഗവര്ണര് ആരിഫ് മുഹമ്മദ് ഖാനോടുള്ള ഈര്ഷ്യ ഒരിക്കല് കൂടി പരസ്യമായി പ്രകടിപ്പിച്ച് മുഖ്യമന്ത്രി പിണറായി വിജയന്. തിരുവനന്തപുരം മസ്കറ്റ് ഹോട്ടലില് മുഖ്യമന്ത്രി സംഘടിപ്പിച്ച ക്രിസ്തുമസ് വിരുന്നില് സംസ്ഥാനത്തെ നാനാതുറകളില് നിന്നുള്ള പ്രമുഖര്ക്ക് ക്ഷണമുണ്ടായിരുന്നെങ്കില് സംസ്ഥാനത്തെ സമുന്നത പദവിയിലിരിക്കുന്ന ഗവര്ണറെ ക്ഷണിച്ചില്ല. പാര്ട്ടിക്ക് ഗവര്ണറെ ക്ഷണമുണ്ടായിരുന്നില്ലെന്ന് രാജ്ഭവന് സ്ഥിരീകരിച്ചു.
ക്രിസ്തുമസ്, പുതുവത്സര ആഘോഷങ്ങളോട് അനുബന്ധിച്ചാണ് കേരള ടൂറിസം വകുപ്പിന്റെ ഉടമസ്ഥതയിലുള്ള മസ്കറ്റ് ഹോട്ടലില് മുഖ്യമന്ത്രി വിരുന്ന് സംഘടിപ്പിച്ചത്. ഭരണകക്ഷി നേതാക്കള്ക്ക് പുറമേ സ്പീക്കര് എ എന് ഷംസീര്, ഡെപ്യൂട്ടി സ്പീക്കര് ചിറ്റയം ഗോപകുമാര്, മന്ത്രിമാര്, പ്രതിപക്ഷ നേതാവ് വിഡി സതീശന്, ചീഫ് സെക്രട്ടറി വി പി ജോയി അടക്കം നിരവധി രാഷ്ട്രീയ, ഉദ്യോഗസ്ഥ പ്രമുഖര് വിരുന്നില് പങ്കെടുത്തിരുന്നു.
ഇവരെ കൂടാതെ കര്ദിനാള് മാര് ജോസഫ് ആലഞ്ചേരി, കര്ദിനാള് ബസേലിയോസ് മാര് ക്ലീമസ്, ബിഷപ്പ് ബസേലിയസ് മാര്ത്തോമ്മ മാത്യൂസ് മൂന്നാമന്, ബിഷപ്പ് ഡോ.തിയോഡേഷ്യസ് മാര്ത്തോമ്മ മെട്രോപൊളിറ്റന്, ആര്ച്ച് ബിഷപ്പ് ഡോ.തോമസ് ജെ നെറ്റോ, ജോസഫ് മാര് ഗ്രിഗോറിയസ് മെട്രോപൊളിറ്റന്, സിറില് മാര് ബസേലിയസ് മെട്രോപൊളിറ്റന് അടക്കമുള്ള പുരോഹിതന്മാരും എസ്എന്ഡിപി നേതാവ് വെള്ളാപ്പള്ളി നടേശനും പാളയം ജുമാമസ്ജിദ് ഇമാം ഡോ.വി പി ഷുഹൈബ് മൗലവിയും സുപ്രീം കോടതി ജഡ്ജി സിറിയക് ജോസഫും വിരുന്നില് പങ്കെടുത്തു.
അതേസമയം ഗവര്ണര് ഇന്നലെ കോഴിക്കോട് കൂട്ടോളിയുള്ള ‘ലവ് ഓഫ് ഹോം’ അന്തേവാസികള്ക്കൊപ്പം ക്രിസ്തുമസ് ആഘോഷിച്ചു.
കഴിഞ്ഞ ആഴ്ച ഗവര്ണര് സംഘടിപ്പിച്ച ക്രിസ്തുമസ് വിരുന്ന് മുഖ്യമന്ത്രിയും കാബിനറ്റ് അംഗങ്ങളും പ്രതിപക്ഷ നേതാവും ബഹിഷ്കരിച്ചിരുന്നു.
Discussion about this post