ശ്രീനഗര്: ജമ്മുവില് സുരക്ഷാ സേനയമായുള്ള ഏറ്റുമുട്ടലില് മൂന്ന് ഭീകരര് കൊല്ലപ്പെട്ടു. ഇന്ന് രാവിലെയാണ് ഏറ്റുമുട്ടല് ഉണ്ടായത്. ട്രക്കിനുള്ളില് ഒളിച്ചിരുന്ന ഭീകരരാണ് കൊല്ലപ്പെട്ടതെന്ന് പോലീസ് അറിയിച്ചു. വെടിവെപ്പിനെ തുടര്ന്ന് ട്രക്കിന് തീപിടിച്ചു. തീയണയ്ക്കാന് അഗ്നിശമനസേനയെ സംഭവസ്ഥലത്തേക്ക് വിളിച്ചതായി പോലീസ് അറിയിച്ചു.
മേഖലയില് സംശയാസ്പദമായി സഞ്ചരിച്ച ട്രക്ക് പോലീസ് ചെക്ക്പോസ്റ്റില് തടഞ്ഞുനിര്ത്തുകയായിരുന്നു. സുരക്ഷാ ഉദ്യോഗസ്ഥര് ട്രക്ക് പരിശോധിക്കാന് ആരംഭിച്ചപ്പോള് അകത്ത് ഒളിച്ചിരിക്കുകയായിരുന്ന ഭീകരര് പോലീസിന് നേര്ക്ക് വെടിവെക്കാന് ആരംഭിച്ചു. തുടര്ന്നുണ്ടായ ഏറ്റുമുട്ടലില് എല്ലാ ഭീകരരും മരിച്ചതായി ജമ്മു എഡിജിപി മുകേഷ് സിംഗ് വ്യക്തമാക്കി.
ട്രക്ക് ഡ്രൈവര് ഓടി രക്ഷപ്പെട്ടതായും ഇയാള്ക്കായുള്ള തിരച്ചില് തുടരുകയാണെന്നും എഡിജിപി അറിയിച്ചു. ഏറ്റുമുട്ടലിനെ തുടര്ന്ന് ഈ മേഖല പോലീസ് സീല് ചെയ്തു. ഹൈവേയിലൂടെയുള്ള വാഹന ഗതാഗതം നിര്ത്തിവെച്ചിരിക്കുകയാണ്.
രാവിലെ ഏഴുമണിയോടെ ആണ് ഏറ്റുമുട്ടല് ആരംഭിച്ചത്. ഇന്നലെ ജമ്മുവിന് സമീപം ഉദ്ദംപൂറില് പോലീസ് വലിയൊരു ഭീകരാക്രമണം പരാജയപ്പെടുത്തിയിരുന്നു. ഇവിടെ 15 കിലോഗ്രാം സ്ഫോടകവസ്തുക്കളാണ് (ഐഇഡി) പോലീസ് നശിപ്പിച്ചത്. ബസന്ത്നഗര് മേഖലയില് നിന്നും സിലിണ്ടര് ആകൃതിയിലുള്ള ഐഇഡി, 300-400 ഗ്രാം ആര്ഡിഎക്സ്, 7.62 മില്ലിമീറ്റര് വലുപ്പമുള്ള ഏഴ് വെടിത്തിരകള്, അഞ്ച് സ്ഫോടകവസ്തുക്കള് എന്നിവയാണ് കണ്ടെടുത്തത്.
ഭീകരസംഘടനയായ ലഷ്കര്-ഇ-ത്വയ്ബയുടെ കോഡുഭാഷയിലുള്ള കടലാസും ലെറ്റര്പാഡും ഇവിടെ നിന്നും കണ്ടെടുത്തു.
Discussion about this post