ചണ്ഡിഗഢ്: കാറപകടത്തില് ഗുരുതരമായി പരിക്കേറ്റ ക്രിക്കറ്റ് താരം ഋഷഭ് പന്തിനെ രക്ഷിച്ചവരെ ആദരിച്ച് ഹരിയാന സര്ക്കാര്. ഡെല്ഹി-ഡെറാഡൂണ് ഹൈവേയില് ആദ്യം അപകടസ്ഥലത്തെത്തിയ ബസ് ഡ്രൈവര് സുശീല് കുമാര്, കണ്ടക്ടര് പരംജിത്ത് എന്നിവരെയാണ് ഹരിയാന റോഡ്വേസ് (ഗതാഗത വകുപ്പ്) ആദരിച്ചത്.
പരിക്കേറ്റ ഒരാളെ രക്ഷപെടുത്തി മികച്ച പ്രവര്ത്തനം കാഴ്ചവെച്ച ഇരുവര്ക്കും അനുമോദനപത്രവും ഫലകവും നല്കിയാണ് ആദരിച്ചതെന്ന് ഹരിയാന റോഡ്വേസ് പാനിപ്പട്ട് ഡിപ്പോ ജനറല് മാനേജര് കുല്ദീപ് ജാംഗ്ര പറഞ്ഞു. റോഡിലെ ഡിവൈഡറില് പന്തിന്റെ മേഴ്സിഡസ് കാര് ഇടിച്ചതുകണ്ട് ബസ് നിര്ത്തി ഇരുവരും ഓടിയെത്തുകയായിരുന്നു. പന്തിനെ ഇവര് പുറത്തെടുത്ത് നിമിഷങ്ങക്കകം കാറിന് തീപിടിക്കുകയും ചെയ്തു. ഇരുവരുടേയും സമയോചിതമായ ഇടപെടല് അഭിനന്ദനാര്ഹമാര്ന്നും ഇവര് മനുഷ്യത്വത്തിന്റെ പ്രതീകമാണെന്നും ജാംഗ്ര പറഞ്ഞു.
അപകടത്തില് ഗുരുതരമായി പരിക്കേറ്റ ഋഷഭ് പന്തിന്റെ നെറ്റിയിലെ മുറിവില് ഇന്ന് പ്ലാസ്റ്റിക് സര്ജറി നടത്തി. ക്രിക്കറ്റ് താരം അപകട നില തരണം ചെയ്തതായി ആശുപത്രി അധികൃതര് അറിയിച്ചിട്ടുണ്ട്.
Discussion about this post