ലക്നൗ: കാടിറങ്ങി വീടിനുള്ളിലേക്ക് കടന്ന പുള്ളിപ്പുലി ഒരു ഗ്രാമത്തെയാകെ പരിഭ്രാന്തിയിലാഴ്ത്തിയത് മണിക്കൂറുകളോളം. ഉത്തർപ്രദേശിലെ അലിഗഡിലുള്ള ജവാൻ ഗ്രാമത്തിലാണ് പുലിയെത്തിയത്. മണിക്കൂറുകൾ നീണ്ട പരിശ്രമത്തിനൊടുവിൽ വനംവകുപ്പ് ഉദ്യോഗസ്ഥർ പുലിയെ പിടികൂടി.
ശനിയാഴ്ച വെെകീട്ടോടെയായിരുന്നു സംഭവം. ഗ്രമവാസിയായ പ്രേംകുമാറിന്റെ വീടിനുള്ളിലേക്കാണ് പുലിയെത്തിയത്. സംഭവ സമയം പ്രേംകുമാറും ഭാര്യയും മകനും വീട്ടിലുണ്ടായിരുന്നു. പുലിയെ കണ്ട് ഭയന്ന ഇവർ വീടിനുള്ളിൽ ഒളിച്ചിരുന്നു. വീടിനുള്ളിലേക്ക് പുലി പോകുന്നതുകണ്ട പ്രദേശവാസികൾ ഉടനെ വിവരം വനംവകുപ്പിനെയും പോലീസിനെയും അറിയിക്കുകയായിരുന്നു.
ഉടനെ അലിഗഢ് ഫോറസ്റ്റ് ഡിപ്പാർട്ട്മെന്റിലെ ഉദ്യോഗസ്ഥർ എത്തി പുലിയെ പിടികൂടാനുള്ള പ്രവർത്തനങ്ങൾ ആരംഭിച്ചു. മണിക്കൂറുകൾ നീണ്ട പ്രയത്നത്തിനൊടുവിൽ തന്ത്രപരമായ നീക്കത്തിലൂടെയായിരുന്നു ഇവർ പുലിയെ പിടികൂടിയത്. തുടർന്ന് വനംവകുപ്പിന്റെ വാഹനത്തിൽ കൊണ്ടുപോയി. വീടിനുള്ളിൽ കുടുങ്ങിക്കിടന്നവരെ പുലി ആക്രമിച്ചിരിക്കാമെന്നായിരുന്നു ഏവരും കരുതിയത്. എന്നാൽ പുലിയെ പിടികൂടുന്നതിന് മുൻപ് തന്നെ ഇവരെ സുരക്ഷിതരായി പുറത്തെത്തിക്കാൻ വനംവകുപ്പിന് സാധിച്ചു.
അതേസമയം പുലിയെ പിടികൂടുന്നതിന്റെ ദൃശ്യങ്ങൾ സമൂഹമാദ്ധ്യമങ്ങളിൽ വ്യാപകമായി പ്രചരിക്കുന്നുണ്ട്.
#WATCH | Leopard safely rescued from a house in the Jawan village of Aligarh, after the feline entered it earlier today#UttarPradesh pic.twitter.com/5LM60agPU0
— ANI UP/Uttarakhand (@ANINewsUP) January 7, 2023
