തൃശൂര്‍: എസ് എന്‍ ഡി പി യോഗത്തിന്റെ മൈക്രോ ഫിനാന്‍സിന്റെ പേരില്‍ തൃശൂര്‍ മണ്ണൂത്തിയിലും തട്ടിപ്പ്. ഒന്നേകാല്‍ കോടിയുടെ തിരിമറി നടന്നെന്നാണ് പൊലീസ് പറയുന്നത്. എസ്.എന്‍.ഡി.പി യൂണിയന്‍ മുഖേന തിരിച്ചടച്ച വായ്പാ തുക ഭാരവാഹികള്‍ തിരിമറി നടത്തിയതോടെ 200 ഓളം കുടുംബങ്ങള്‍ക്ക് ബാങ്ക് ജപ്തി നോട്ടീസയച്ചു.
പതിനാല് പേര്‍ അംഗങ്ങളായ സംഘം എസ്.എന്‍.ഡി.പി യോഗം മൈക്രോഫിനാന്‍സിലൂടെ തവണകളായി അഞ്ച് ലക്ഷം രൂപ വായ്പയെടുത്ത വലക്കാവ് ഗുരുപ്രസാദം സഹായസംഘത്തിന്റെ കണ്‍വീനര്‍ കോമളം ഉള്‍പ്പടെയുള്ളവര്‍ തട്ടിപ്പിന് ഇരയായി. എസ്.എന്‍.ഡി.പി മണ്ണുത്തി യൂണിയന്‍ മുഖേന കോമളം പണം തിരിച്ചടച്ചിരുന്നു. എന്നാല്‍ വായ്പാ കുടിശ്ശികയായി 52,70000 രൂപ തിരിച്ചടയ്ക്കണമെന്ന് കാണിച്ച് ഇവരുടേതുള്‍പ്പെടെ പതിനഞ്ച് വനിതാ സ്വാശ്രയ സംഘങ്ങള്‍ക്ക് നോട്ടീസ് അയച്ചിരിക്കുകയാണ് ധനലക്ഷ്മി ബാങ്ക്.
യൂണിയന്‍ ഓഫീസില്‍ അടച്ച തുക ബാങ്കിലെത്താതെ എവിടെപ്പോയെന്ന അന്വേഷണം ചെന്നെത്തിയത് ഭാരവാഹികളിലാണ്. പണം തിരിമറി നടത്തിയതിന് മണ്ണുത്തി യൂണിയന്‍ കണ്‍വീനര്‍ പവിത്രന്‍ അടക്കം നാല് പേരെ സ്വയംസഹായസംഘങ്ങളുടെ പരാതിയില്‍ പൊലീസ് പിന്നീട് അറസ്റ്റ് ചെയ്തു.
Discussion about this post