ദുബായ്: നിര്ബന്ധിത സ്വദേശിവല്ക്കരണത്തിന്റെ ഭാഗമായുള്ള ലക്ഷ്യങ്ങള് പൂര്ത്തിയാക്കാത്ത സ്വകാര്യ കമ്പനികളില് നിന്നും ഈടാക്കുന്ന പിഴത്തുക വര്ധിപ്പിക്കാന് യുഎഇ തീരുമാനം. ഈ വര്ഷത്തെ എമിറാത്തിവല്ക്കരണ ലക്ഷ്യങ്ങള് പൂര്ത്തിയാകാത്ത കമ്പനികളില് നിന്നും തൊഴിലാളിയൊന്നിന് 84,000 ദിര്ഹം ഈടാക്കുമെന്ന് യുഎഇ മാനവവിഭവശേഷി, എമിറാത്തിവല്ക്കരണ മന്ത്രി ഡോ.അബ്ദുള്റഹ്മാന് അല് അവ്വര് വ്യക്തമാക്കി. നേരത്തെ 72,000 ദിര്ഹം ഈടാക്കിയിരുന്ന സ്ഥാനത്താണിത്.
ഈ വര്ഷം അവസാനത്തോടെ അമ്പതോ അതില് കൂടുതലോ വിദഗ്ധ തൊഴിലാളികള് ഉള്ള സ്വകാര്യ കമ്പനികളില് നാല് ശതമാനം എമിറാത്തികള് ആയിരിക്കണമെന്നതാണ് സര്ക്കാര് നിര്ദ്ദേശം. കഴിഞ്ഞ വര്ഷം ഇത് രണ്ട് ശതമാനമായിരുന്നു. ഇതില് വീഴ്ച വരുത്തുന്ന പക്ഷം നിയമിക്കാത്ത ഒരു എമിറാത്തിക്ക് 84,000 ദിര്ഹം എന്ന രീതിയില് കമ്പനിക്ക് മേല് പിഴ ചുമത്തും.
2022ല് എമിറാത്തിവല്ക്കരണത്തില് വീഴ്ച വരുത്തിയ സ്വകാര്യ കമ്പനികളില് നിന്ന് 400 ദശലക്ഷം ദിര്ഹം പിഴ ഈടാക്കിയതായി കഴിഞ്ഞ ദിവസം മാനവവിഭവശേഷി മന്ത്രാലയം വ്യക്തമാക്കിയിരുന്നു. ഏതാണ്ട് 9,293 കമ്പനികള് 2022ലെ എമിറാത്തിവല്ക്കരണ ലക്ഷ്യങ്ങള് പൂര്ത്തീകരിച്ചു.
ഏഴായിരത്തോളം കമ്പനികള് ആദ്യമായി ജോലിക്ക് എമിറാത്തികളെ നിയമിച്ചതായി മന്ത്രി വ്യക്തമാക്കി. ലക്ഷ്യത്തിന് ഉപരിയായി എമിറാത്തികളെ നിയമിച്ച കമ്പനികളെ ആദരിക്കാന് ആലോചിക്കുന്നതായും മന്ത്രി അറിയിച്ചു.
Discussion about this post