ചിക്കബല്ലാപൂർ: ഇഷ ഫൗണ്ടേഷൻ സാരഥി സദ്ഗുരു ജഗ്ഗി വാസുദേവിനും അനുയായികൾക്കും സന്തോഷവാർത്തയുമായി കർണാടക ഹൈക്കോടതി. താലൂക്കിലെ അവലഗുർക്കി കൗരനഹള്ളിക്ക് സമീപം സദ്ഗുരു സന്നിധിയിലെ ആദിയോഗി വിഗ്രഹം അനാച്ഛാദനം ചെയ്യുന്നതിന് അനുമതി നൽകി ഹൈക്കോടതി.
ജനുവരി 15 ഞായറാഴ്ച ഉപരാഷ്ട്രപതിയുടെ സാന്നിധ്യത്തിൽ ഇഷ ഫൗണ്ടേഷന്റെ പേരിൽ ആദിയോഗിയുടെ പ്രതിമ അനാച്ഛാദനം ചെയ്തേക്കും. ഇഷ ഫൗണ്ടേഷൻ 2023 ജനുവരി 15 ന് ആസൂത്രണം ചെയ്ത പ്രകാരം ഷെഡ്യൂൾ ചെയ്ത പ്രവർത്തനങ്ങൾ തുടരാമെന്ന് കർണാടക ഹൈക്കോടതിയുടെ ഡിവിഷൻ ബെഞ്ച് വ്യക്തമാക്കി.
ചീഫ് ജസ്റ്റിസ് പ്രസന്ന വരാലെ അധ്യക്ഷനായ ബെഞ്ചിന്റേതാണ് വിധി. നിർമ്മാണ പ്രവർത്തനങ്ങൾ പുരോഗമിക്കുകയാണെന്നും 112 അടി ഉയരമുള്ള ആദിയോഗി വിഗ്രഹം ആശ്രമത്തിൽ ഉദ്ഘാടനം ചെയ്യാൻ തയ്യാറാണെന്നും ഇഷ ഫൗണ്ടേഷൻ സ്ഥാപകൻ ജഗ്ഗി വാസുദേവ് നേരത്തെ പറഞ്ഞിരുന്നു. ഉപരാഷ്ട്രപതി ജഗ്ദീപ് ധങ്കർ, കർണാടക മുഖ്യമന്ത്രി ബസവരാജ ബൊമ്മൈ, ആരോഗ്യമന്ത്രി ഡോ. കെ. സുധാകരൻ ഉൾപ്പെടെയുള്ളവർ ആദിയോഗി വിഗ്രഹ പ്രതിഷ്ഠ നടത്താനെത്തും.
അന്നേ ദിവസം രാവിലെ എട്ടിന് യോഗലിംഗേശ്വര പ്രതിഷ്ഠാ പരിപാടി നടക്കും. ആദിയോഗിയുടെ പ്രതിമ സ്ഥാപിക്കരുതെന്നും സ്ഥലം പരിസ്ഥിതി ലോല മേഖലയാണെന്നും വാണിജ്യ ആവശ്യങ്ങൾക്ക് ഉപയോഗിക്കുന്നത് ശരിയല്ലെന്നും കാട്ടിയായിരുന്നു ഹർജി. ഇതാണ് കോടതി തീർപ്പാക്കിയത്.
