മീററ്റ്: 26,000-ത്തിലധികം ചെറിയ വജ്രക്കല്ലുകൾ ഉപയോഗിച്ച് മീററ്റ് സ്വദേശി നിർമ്മിച്ച മോതിരം ഗിന്നസ് റെക്കോർഡിലേക്ക്. ഡാലിയ പൂവിന്റെ ആകൃതിയിലുള്ള മോതിരം മീററ്റിലെ ‘ഡാസ്ലിംഗ് ഡയമണ്ട്സ് ‘ എന്ന ജൂവലറിയാണ് നിർമ്മിച്ചത്. ഒരേ ആകൃതിയിലുള്ള 26,200 വജ്രക്കല്ലുകളാണ് ഈ മോതിരത്തിലുള്ളത്. മോതിരത്തിന് ‘ദേവ് മുദ്രിക’ എന്നാണ് പേരിട്ടിരിക്കുന്നതെന്ന് ഡാസ്ലിംഗ് ഡയമണ്ട്സിന്റെ ഉടമ വിപുൽ അഗർവാൾ പറഞ്ഞു.
മോതിരത്തിൽ 26,000-ലധികം വജ്രക്കല്ലുകളുണ്ട്. ലോകത്ത് ഏറ്റവും കൂടുതൽ വജ്രം ഘടിപ്പിച്ച മോതിരമാണിത്. ഇതിന് മുൻപത്തെ റെക്കോർഡ് 24,000 വജ്രക്കല്ലുകളായിരുന്നു. വിശദവിവരങ്ങൾ കാണിച്ച് ഗിന്നസ് ബുക്ക് ഓഫ് വേൾഡ് റെക്കോർഡിലേക്ക് അപേക്ഷ അയച്ചിട്ടുണ്ട്. അത് ലഭിക്കുമെന്ന് ഞങ്ങൾക്ക് ഉറപ്പുണ്ട്. അഗർവാൾ പറഞ്ഞു. ഏകദേശം 8 മുതൽ 10 വരെ കരകൗശല വിദഗ്ധരാണ് ഈ മോതിരം നിർമ്മിക്കാൻ ഉണ്ടായിരുന്നത്. 3 മാസം കൊണ്ടാണ് ഇത് നിർമ്മിച്ചത്.
ഒരേ വലിപ്പമുള്ള 26,000 വജ്രക്കല്ലുകൾ ശേഖരിക്കുന്നതും വലിയ വെല്ലുവിളിയായിരുന്നു. ഞങ്ങൾ ആദ്യം സോഫ്റ്റ്വെയറിൽ ഡിസൈൻ പൂർത്തിയാക്കി, തുടർന്ന് കരകൗശല ജോലികൾക്കായി കരകൗശല വിദഗ്ധരെ നിയോഗിച്ചു. മോതിരം ഒരേസമയം രണ്ട് വിരലുകളിൽ ധരിക്കാം. അഗർവാൾ പറഞ്ഞു. മോതിരത്തിന്റെ വില ഇതുവരെ തീരുമാനിച്ചിട്ടില്ല, അത് ഗിന്നസ് ബുക്കിൽ പ്രവേശിച്ചതിന് ശേഷം മാത്രമേ തീരുമാനിക്കൂവെന്നും വിപുൽ അഗർവാൾ പറഞ്ഞു.
