ന്യൂഡൽഹി: അദാനി ഗ്രൂപ്പ് ബ്രോഡ്കാസ്റ്ററിന്റെ നിയന്ത്രണം ഏറ്റെടുത്തതിന് പിന്നാലെ എൻഡിടിവിയുടെ മുതിർന്ന ഉദ്യോഗസ്ഥർ രാജിവെച്ചു. എൻഡിടിവി ഗ്രൂപ്പ് പ്രസിഡന്റ് ഉൾപ്പെടെ മൂന്ന് മുതിർന്ന എക്സിക്യൂട്ടീവുകൾ അംഗങ്ങളാണ് രാജിവെച്ചവരിൽ ഉൾപ്പെടുന്നത്. എൻഡിടിവി ഗ്രൂപ്പിന്റെ പ്രസിഡന്റ് സുപർണ സിംഗ്, ചീഫ് സ്ട്രാറ്റജി ഓഫീസർ അരിജിത് ചാറ്റർജി, ചീഫ് ടെക്നോളജി ആൻഡ് പ്രൊഡക്റ്റ് ഓഫീസർ കവൽജിത് സിംഗ് ബേദി എന്നിവരാണ് രാജിവെച്ചത്.
” കമ്പനിക്ക് പുതിയ ലക്ഷ്യങ്ങളും ദിശാബോധവും വേണം. ഇതിനായി ഒരു പുതിയ നേതൃത്വ ടീമിനെ രൂപീകരിക്കാനുള്ള പ്രക്രിയയിലാണ് കമ്പനി , ,” എൻഡിടിവി പറഞ്ഞു. ശതകോടീശ്വരനായ ഗൗതം അദാനിയാണ് എൻഡിടിവി ഏറ്റെടുത്തത്. തുടർന്ന് അതിന്റെ സ്ഥാപകരായ പ്രണോയ് റോയിയും രാധിക റോയിയും ഡയറക്ടർ സ്ഥാനം രാജിവെച്ചതായി എൻഡിടിവി അറിയിച്ചിരുന്നു. എൻഡിടിവിയുടെ 64.72 ശതമാനം ഓഹരിയാണ് അദാനി ഗ്രൂപ്പ് സ്വന്തമാക്കിയത്. അദാനി എന്റർപ്രൈസസ് ലിമിറ്റഡ്, ആർആർപിആർ ഹോൾഡിംഗ്, വിശ്വപ്രധാൻ കൊമേഴ്സ്യൽ എന്നിവരാണ് പ്രധാന ഷെയർഹോൾഡേഴ്സ്.
കൽക്കരി ഖനനം, തുറമുഖങ്ങൾ എന്നിവയ്ക്കപ്പുറം വിമാനത്താവളങ്ങൾ, ഡാറ്റാ സെന്ററുകൾ, സിമന്റ്, ഡിജിറ്റൽ സേവനങ്ങൾ എന്നീ മേഖലികളിലായിരുന്നു അദാനി ഗ്രൂപ്പിൻറെ ആദ്യ വിപുലീകരണം. വൈവിധ്യവൽക്കരണത്തിന്റെ ഭാഗമായി പിന്നാലെയാണ് മാധ്യമമേഖലയിലേക്കും അദാനി ഗ്രൂപ്പ് കാൽവെച്ച് തുടങ്ങിയത്. അദാനി ഗ്രൂപ്പ് ഏറ്റെടുത്തതോടെ എൻഡിടിവിയുടെ ഓഹരികൾ ബിഎസ്ഇയിൽ ഒന്നിന് 305 രൂപയിൽ എത്തിനിൽക്കുകയാണ്. 4.67 ശതമാനമാണ് ഓഹരി നിരക്ക് ഉയർന്നത്.
