വാരാണസി: ലോകത്തിലെ ഏറ്റവും ദൈർഘ്യമേറിയ നദീജലസവാരി നടത്തുന്ന എംവി ഗംഗാ വിലാസ് ക്രൂയിസ് കപ്പലിലെ ബുക്കിംഗ് 2024 മാർച്ച് വരെ പൂർത്തിയായി. 2024 ഏപ്രിലിന് ശേഷം മാത്രമേ ഇനി പുതിയ ബുക്കിംഗ് സ്വീകരിക്കുകയുള്ളു എന്നും അധികൃതർ വ്യക്തമാക്കി. 51 ദിവസത്തെ ആഡംബര കപ്പൽ യാത്രയ്ക്ക് ഏകദേശം 20 ലക്ഷത്തോളം രൂപയാണ് ഒരാൾക്ക് ചെലവ് വരുന്നത്. ഗംഗ, ഭാഗീരഥി, ഹൂഗ്ലി, ബ്രഹ്മപുത്ര, വെസ്റ്റ് കോസ്റ്റ് കനാൽ തുടങ്ങീ ഇന്ത്യയിലെ 27 നദീതടങ്ങളിലൂടെയാണ് ആഡംബര ബോട്ട് സഞ്ചരിക്കുന്നത്. 3200 കിലോമീറ്റർ ദൂരമാണ് 51 ദിവസം കൊണ്ട് പൂർത്തിയാക്കുന്നത്.
അടുത്ത വർഷം ഏപ്രിലിന് ശേഷം മാത്രമേ പുതിയ ബുക്കിംഗുകൾ സാധ്യമാകൂ എന്ന് ഗംഗാ വിലാസിന്റെ പ്രവർത്തനം ഏറ്റെടുത്തിരിക്കുന്ന അന്താര ലക്ഷ്വറി റിവർ ക്രൂയിസിന്റെ സ്ഥാപകനും സിഇഒയുമായ രാജ് സിംഗ് പറഞ്ഞു. പൂർണമായും വെജിറ്റേറിയൻ ഭക്ഷണമാണ് യാത്രക്കാർക്കായി ഒരുക്കിയിരിക്കുന്നത്. മദ്യവും അനുവദനീയമല്ല. പ്രാദേശിക ഭക്ഷണമാണ് കൂടുതലായും നൽകുന്നത്. 62 മീറ്റർ നീളമുള്ള കപ്പൽ പൂർണമായും ഇന്ത്യയിലാണ് നിർമ്മിച്ചത്. 68 കോടി രൂപയാണ് ഇതിന് നിർമ്മാണ ചെലവ് വന്നിരിക്കുന്നതെന്നും രാജ് സിംഗ് പറഞ്ഞു
ആഡംബര കപ്പലിൽ മൂന്ന് ഡെക്കുകളും 18 സ്യൂട്ടുകളും ഉണ്ട്. ബംഗ്ലാദേശ് വഴി ആസാമിലെ ദിബ്രുഗഡിലേക്കാണ് ആഡംബര കപ്പലിന്റെ യാത്ര. 50ലധികം വിനോദസഞ്ചാര കേന്ദ്രങ്ങൾ, ചരിത്ര സ്മാരകങ്ങൾ, വാരാണസി ഗംഗാ ആരതി, കാസിരംഗ നാഷണൽ പാർക്ക്, സുന്ദർബൻസ് ഡെൽറ്റ തുടങ്ങിയവ കാണാനും സഞ്ചാരികൾക്ക് അവസരമുണ്ട്. കൊൽക്കത്ത, ധാക്ക തുടങ്ങിയ ഇടങ്ങളിലൂടെയെല്ലാം കപ്പൽ സഞ്ചരിക്കും. ഏകദേശം 1100 കിലോമീറ്റർ ദൂരം ബംഗ്ലാദേശിലൂടെയാണ് കപ്പൽ സഞ്ചരിക്കുന്നത്. 25,000 മുതൽ 50,000 വരെയാണ് പ്രതിദിന നിരക്ക്. അന്താര ലക്ഷ്വറി റിവർ ക്രൂയിസിന്റെ ഔദ്യോഗിക വെബ്സൈറ്റിൽ നിന്നാണ് യാത്രയ്ക്കായി ബുക്ക് ചെയ്യേണ്ടത്.
Discussion about this post