തിരുവനന്തപുരം: ശുഭ്മാൻ ഗില്ലിന് പിന്നാലെ കാര്യവട്ടത്ത് സെഞ്ച്വറി നേടി വിരാട് കോഹ്ലിയും. 85 പന്തിൽ 10 ഫോറും ഒരു സിക്സും ഉൾപ്പെടെയാണ് കോഹ്ലി സെഞ്ച്വറി തികച്ചത്. ഏകദിനത്തിലെ നാൽപ്പത്തിയാറാം സെഞ്ച്വറിയും കരിയറിലെ എഴുപത്തിനാലാം സെഞ്ച്വറിയുമാണ് ഇതിഹാസ താരം കാര്യവട്ടത്ത് കുറിച്ചത്.
നേരത്തേ ടോസ് നേടി ബാറ്റിംഗ് തിരഞ്ഞെടുത്ത ഇന്ത്യക്ക് വേണ്ടി ഓപ്പണർ ശുഭ്മാൻ ഗില്ലും സെഞ്ച്വറി നേടിയിരുന്നു. 97 പന്തിൽ 14 ഫോറുകളുടെയും 2 സിക്സറുകളുടെയും അകമ്പടിയോടെ 116 റൺസ് നേടിയാണ് ഗിൽ മടങ്ങിയത്. ശ്രീലങ്കൻ ബൗളർമാരെ തലങ്ങും വിലങ്ങും പായിച്ച ഗിൽ കാര്യവട്ടത്ത് കാഴ്ചവെച്ചത് കരിയറിലെ മികച്ച ഇന്നിംഗ്സുകളിൽ ഒന്നാണ്. ഉറച്ച പിന്തുണയാണ് താരത്തിന് വിരാട് കോഹ്ലി നൽകിയത്.
നിലവിൽ ഇന്ത്യ 43 ഓവറിൽ 2 വിക്കറ്റ് നഷ്ടത്തിൽ 303 റൺസ് എടുത്തിട്ടുണ്ട്. 27 പന്തിൽ 34 റൺസുമായി ശ്രേയസ് അയ്യരാണ് കോഹ്ലിക്ക് കൂട്ടായി ക്രീസിലുള്ളത്.
