ന്യൂഡൽഹി; ക്യാബിൻ ക്രൂവിനോട് മോശമായി പെരുമാറിയെന്ന് പരാതി ഉയർന്ന യാത്രക്കാരനെ ഇറക്കി വിട്ട് സ്‌പൈസ് ജെറ്റ്. ഡൽഹിയിൽ നിന്നും ഹൈദരാബാദിലേക്കുളള എസ്ജി 8133 വിമാനത്തിലായിരുന്നു സംഭവം. ക്യാബിൻ ക്രൂവിൽ ഒരാളുടെ ശരീരത്തിൽ യാത്രക്കാരൻ മോശമായി സ്പർശിച്ചുവെന്ന് ആരോപിച്ചായിരുന്നു പ്രശ്‌നങ്ങളുടെ തുടക്കം.
ക്യാബിൻ ക്രൂ സംഭവം ചോദ്യം ചെയ്തതോടെ വാക്കുതർക്കത്തിലേക്ക് നീണ്ടു. മറ്റ് യാത്രക്കാരും വിഷയത്തിൽ ഇടപെട്ടു. എന്നാൽ ഇയാൾ മനപ്പൂർവ്വമല്ല ആകസ്മികമായി സംഭവിച്ചതാണെന്ന് ചില യാത്രക്കാർ ചൂണ്ടിക്കാട്ടി. തർക്കം നീണ്ടതോടെ ക്യാബിൻ ക്രൂ സുരക്ഷാ ജീവനക്കാരെ വിവരം അറിയിക്കുകയായിരുന്നു.
തുടർന്ന് പ്രശ്‌നമുണ്ടാക്കിയ യാത്രക്കാരനെയും ഇയാൾക്ക് ഒപ്പമുണ്ടായിരുന്ന ആളെയും പുറത്തിറക്കിയ ശേഷമാണ് വിമാനം യാത്ര പുറപ്പെട്ടത്. ഇയാൾ പിന്നീട് മാപ്പ് എഴുതി നൽകി വിഷയം പരിഹരിച്ചു. യാത്രക്കാരനെതിരെ തുടർനടപടി ഉണ്ടായേക്കില്ലെന്നാണ് വിമാനകമ്പനി വൃത്തങ്ങൾ നൽകുന്ന സൂചന. സംഭവത്തിന്റെ വീഡിയോ ട്വിറ്ററിൽ പ്രചരിക്കുന്നുണ്ട്.
Discussion about this post