അപകടമാം വിധം അലക്ഷ്യമായി ലോറി ഓടിക്കുന്ന ഒരും ഡ്രൈവറുടെ ദൃശ്യങ്ങൾ സമൂഹമാദ്ധ്യമങ്ങളിൽ വൈറലായിരുന്നു. ഡ്രൈവ് ചെയ്യുന്നതിനിടെ ഡ്രൈവർ വെള്ളത്തിന്റെ കുപ്പി കൊണ്ട് ആക്സിലറേറ്റർ ബാലൻസ് ചെയ്ത തോർത്ത് കൊണ്ട് സ്റ്റിയറിംഗ് കെട്ടി വച്ച് ഡ്രൈവിംഗ് സീറ്റിന് പുറകിൽ പോയി കിടക്കുന്ന വീഡിയോയാണിത്. ഇത് വൈറലായതോടെ വിമർശനവുമായി നിരവധി പേർ രംഗത്തെത്തിയിരുന്നു. ഇത്തരം സാഹസങ്ങൾ കാരണം സാധാരണക്കാരുടെ ജീവൻ വരെ അപകടത്തിലാകുമെന്നായിരുന്നു വിമർശനം.
തുടർന്ന് വീഡിയോയുടെ ഒറിജിനൽ വേർഷൻ എംവിഡി ഉൾപ്പെടെ പങ്കുവെയ്ക്കുകയും ചെയ്തു. ട്രെയിനിൽ കൊണ്ടുപോയ ലോറിയിലിരുന്നാണ് ഡ്രൈവർ ഇത് ചെയ്തത് എന്ന് വ്യക്തമാക്കുന്ന വീഡിയോയായിരുന്നു ഇത്. വീഡിയോയിൽ ട്രെയിനിന്റെ ശബ്ദവും കേൾക്കാൻ സാധിക്കും.
എന്തായാലും സംഭവത്തിൽ വ്യക്തത വരുത്തിക്കൊണ്ട് കേരള പോലീസും രംഗത്തെത്തിയിരിക്കുകയാണ്. വൈറലായ ഡ്രൈവറുടെ വീഡിയോയാണ് കേരള പോലീസ് സമൂഹമാദ്ധ്യമങ്ങളിൽ പങ്കുവെച്ചത്.
”വൈറൽ എല്ലാം റിയൽ അല്ല! ആ ഡ്രൈവർ പറയുന്നു, ‘സ്റ്റിയറിംഗ് കെട്ടി വച്ചൊന്നും വാഹനം ഓടിക്കാൻ കഴിയൂല്ല.. ആരും അനുകരിക്കരുതേ ” എന്ന തലക്കെട്ടോടെയാണ് വീഡിയോ പോസ്റ്റ് ചെയ്തിരിക്കുന്നത്.
”ട്രെയ്നിൽ പോകുന്ന സമയത്ത് ഒരു വ്ലോഗ് ചെയ്യാമെന്ന് വിചാരിച്ച് ചെയ്തതാണ്. അത് ഫാമിലി ഗ്രൂപ്പിൽ ഇട്ടിരുന്നു. എന്നാൽ ആരാണ് അത് ഫേസ്ബുക്കിൽ പങ്കുവെച്ചത് എന്നറിയില്ല. ഒരു നൂറ് മീറ്റർ പോലും അങ്ങനെ വാഹനം ഓടിക്കാൻ സാധിക്കില്ല. ആരും അത് ചെയ്യരുത്” എന്ന് ഡ്രൈവർ പറയുന്നത് കേൾക്കാം.
Discussion about this post