മണലാരണ്യം കണ്ട് മടുത്തവര്ക്ക് പച്ചപ്പിന്റെ കാഴ്ചയൊരുക്കി കാത്തിരിക്കുകയാണ് യുഎഇയിലെ മരുഭൂമി. കഴിഞ്ഞ മാസം യുഎഇയില് ഉടനീളം മൂന്നുനാലു ദിവസം കനത്ത മഴ ലഭിച്ചതോടെയാണ് ഇവിടുത്തെ മരുഭൂമികളെല്ലാം പച്ച പുതച്ചത്.
മരുഭൂമികള്ക്ക് പ്രസിദ്ധമായ രാജ്യമാണ് യുഎഇ. ലോകത്തിലെ തന്നെ ഏറ്റവും വലിയ മണല്ക്കൂനകളില് ചിലത് യുഎഇയില് ആണ്. കണ്ണെത്താദൂരം മണല് പരന്ന് കിടക്കുന്ന മരുഭൂമികള് യുഎഇയിലെ പ്രധാന ടൂറിസം സ്പോട്ട് കൂടിയാണ്. വര്ഷത്തിന്റെ ഏറിയ പങ്കും മണല്ക്കുപ്പായമിട്ട് വെയിലുകായുന്ന മരുഭൂമികള് ശൈത്യകാലമെത്തിയാല് നേര്ത്ത പച്ചപ്പുതപ്പും പുതയ്ക്കാറുണ്ട്.
ഏതായാലും ജനുവരി മാസത്തില് മഴ അലിവ് കാട്ടിയതോടെ മരുഭൂമികള് മരുപ്പച്ചയായി മാറി. മരുഭൂമിയിലേക്ക് ഉല്ലാസയാത്ര പോകാന് പ്ലാന് ചെയ്തിരിക്കുന്ന പ്രവാസികള്ക്ക് അവിടെ പോകാന് ഏറ്റവും മികച്ച സമയമാണിത്. സ്വര്ണ്ണവര്ണ്ണത്തില് തിളങ്ങിയിരിക്കുന്ന മരുഭൂമി ഇപ്പോള് പച്ചപ്പും പൂക്കളുമായാണ് അതിഥികളെ വരവേല്ക്കുക.
പച്ചപ്പണിഞ്ഞിരിക്കുന്ന മരുഭൂമികള് കണ്ടാല് പണ്ടിവിടം മണലാരണ്യമായിരുന്നോ എന്നുപോലും തോന്നുന്നവിധമാണ് പച്ചപ്പിന്റെ സമൃദ്ധി ഇവിടെ കാണാന് കഴിയുക.
Discussion about this post