ഈ പ്രപഞ്ചത്തില്‍ ഓരോ നക്ഷത്രവും പുതിയൊരു ജീവന്റെയും അഭയസ്ഥാനത്തിന്റെയും പ്രതീക്ഷയാണ്. ഇപ്പോഴിതാ, നാസയുടെ ജെയിംസ് വെബ് ടെലസ്‌കോപ്പ് നമ്മുടെ ക്ഷീരപഥത്തിന് സമാനമായ മറ്റൊരു ആകാശഗംഗയെ കണ്ടെത്തിയിരിക്കുന്നു. ഭൂമിയില്‍ നിന്നും ഏതാണ്ട് 9 ശതകോടി പ്രകാശവര്‍ഷം അകലെയാണ് ഈ ആകാശഗംഗ.
സ്പാര്‍ക്‌ളര്‍ എന്ന് പേരിട്ടിരിക്കുന്ന ഈ ആകാശഗംഗ, തെക്കന്‍ നക്ഷത്രസമൂഹമായ വോളന്‍സിലാണ് സ്ഥിതി ചെയ്യുന്നത്. ഏതാണ്ട് രണ്ട് ഡസണ്‍ മിന്നിത്തിളങ്ങുന്ന നക്ഷത്രക്കൂട്ടം (ഗ്ലോബുലാര്‍ ക്ലസ്റ്റര്‍) ചുറ്റും ഭ്രമണം ചെയ്യുന്നതിനാലാണ് ഇതിന് സ്പാര്‍ക്‌ളര്‍ എന്ന പേര് നല്‍കിയിരിക്കുന്നത്. ഓരോ ക്ലസ്റ്ററിലും ഏകദേശം ദശലക്ഷം നക്ഷത്രങ്ങളെങ്കിലും ഉണ്ടായിരിക്കുമെന്നാണ് അനുമാനം. നമ്മുടെ ക്ഷീരപഥത്തില്‍ നിലവില്‍ ഏതാണ്ട് 200 ഗ്ലോബുലാര്‍ ക്ലസ്റ്ററുകള്‍ ഉണ്ട്.
പ്രപഞ്ചത്തിന് കേവലം നാല് ശതകോടി പ്രായമുള്ളപ്പോള്‍ ഉണ്ടായിരുന്ന അവസ്ഥയിലുള്ള സ്പാര്‍ക്‌ളറിന്റെ ചിത്രമാണ് ജെയിംസ് വെബ് ടെലസ്‌കോപ്പിന് ലഭിച്ചിരിക്കുന്നത്. അതായത് നിലവിലെ പ്രപഞ്ചം അതിന്റെ മൂന്നിലൊന്ന് പ്രായത്തിലായിരിക്കുമ്പോള്‍ ഉള്ള കാലത്തെ ചിത്രം. ക്ഷീരപഥത്തിന്റെ അതേ വേഗതയിലാണ് ഈ പുതിയ ആകാശഗംഗയും വളര്‍ന്നതെങ്കില്‍ നിലവില്‍ ഏതാണ്ട് 9 ശതകോടി വര്‍ഷമായിരിക്കും അതിന്റെ പ്രായമെന്ന് ശാസ്ത്രമാധ്യമങ്ങള്‍ റിപ്പോര്‍ട്ട് ചെയ്യുന്നു.
ഈ ആകാശഗംഗയെ കുറിച്ചുള്ള കൂടുതല്‍ അന്വേഷണങ്ങള്‍ ക്ഷീരപഥത്തിന്റെ പരിണാമത്തെ കുറിച്ച് കൂടുതല്‍ ഉള്‍ക്കാഴ്ചകള്‍ നല്‍കുമെന്നാണ് ശാസ്ത്രസമൂഹത്തിന്റെ പ്രതീക്ഷ. സ്പാര്‍ക്‌ളറിന്റെ കണ്ടെത്തല്‍ സംബന്ധിച്ച റിപ്പോര്‍ട്ട് റോയല്‍ അസ്‌ട്രോണമിക്കല്‍ സൊസാറ്റിയുടെ നോട്ടീസില്‍ പ്രസിദ്ധീകരിച്ചിട്ടുണ്ട്.
Discussion about this post