‘മുലായം സിംഗ് യാദവ് സ്വപ്‌നത്തിൽ വന്ന് കെട്ടിപ്പിടിച്ച് അനുഗ്രഹിച്ചു; അദ്ദേഹത്തിന്റെ ഗ്രാമത്തിലൂടെ ഞങ്ങൾ ഒരുമിച്ച് സൈക്കിൾ ചവിട്ടി’; ആ സന്തോഷത്തിൽ താൻ സെക്രട്ടേറിയറ്റിലേക്ക് സൈക്കിളിൽ പോവുകയാണെന്ന് തേജ് പ്രതാപ് യാദവ്

പാട്‌ന: അന്തരിച്ച മുലായം സിംഗ് യാദവിനെ രാത്രി സ്വപ്നത്തിൽ കണ്ടുവെന്നും അദ്ദേഹം തന്നെ അനുഗ്രഹിച്ചുവെന്നും അവകാശവാദവുമായി ലാലു പ്രസാദ് യാദവിന്റെ മൂത്ത മകൻ തേജ് പ്രതാപ് യാദവ്. ഉത്തർപ്രദേശ് മുൻ മുഖ്യമന്ത്രിയും സമാജ് വാദി പാർട്ടി സ്ഥാപകനുമായ മുലായം സിംഗ് യാദവ് വാർധക്യ സഹജമായ അസുഖങ്ങളെ തുടർന്ന് കഴിഞ്ഞ വർഷം ഒക്ടോബറിലാണ് അന്തരിച്ചത്.

അദ്ദേഹം സ്വപ്‌നത്തിൽ വന്ന് അനുഗ്രഹിച്ചതിന്റെ സന്തോഷത്തിലാണ് സെക്രട്ടേറിയറ്റിലേക്ക് സൈക്കിളിൽ യാത്ര ചെയ്യുന്നതെന്നും തേജ് പ്രതാപ് പറയുന്നു. ബീഹാറിൽ വനം പരിസ്ഥിതി മന്ത്രിയാണ് തേജ് പ്രതാപ്. ” ഇന്ന് രാവിലെ ഞാൻ എന്റെ സ്വപ്‌നത്തിൽ മുലായം സിംഗ് ജിയെ കണ്ടു. അദ്ദേഹം എന്നെ കെട്ടിപ്പിടിച്ച് സ്നേഹപൂർവ്വം അനുഗ്രഹിച്ചു. അദ്ദേഹം തെളിച്ച പാതയിലൂടെ ജീവിതത്തിൽ ഉടനീളം സഞ്ചരിക്കും. അതുകൊണ്ട് ഇന്ന് സൈക്കിളിലാണ് എന്റെ മന്ത്രാലയമായ ആരണ്യഭവനിലേക്ക് ഞാൻ പോകുന്നത്”. തേജ് പ്രതാപ് ട്വീറ്റ് ചെയ്തു.

സൈക്കിൾ ചവിട്ടൂ പരിസ്ഥിതിയെ സംരക്ഷിക്കൂ എന്ന അടിക്കുറിപ്പോടെ സൈക്കിൾ ചവിട്ടുന്ന ചിത്രങ്ങളും തേജ് പ്രതാപ് പങ്കുവച്ചിട്ടുണ്ട്. പരിസ്ഥിതിയെ സംരക്ഷിക്കണമെന്നുള്ള മുലായം സിംഗ് യാദവിന്റെ സന്ദേശം ഏവരിലേക്കും എത്തിക്കുന്നതിനാണ് സൈക്കിൾ ചവിട്ടിയതെന്ന് ഒരു ദേശീയ മാദ്ധ്യമത്തോട് അദ്ദേഹം പറഞ്ഞു. ” വൃന്ദാവനത്തിൽ പോകുന്നതും അവിടെ വച്ച് നേതാജിയെ(മുലായം സിംഗ്) കാണുന്നതുമാണ് ഞാൻ സ്വപ്‌നം കണ്ടത്. അതിന് ശേഷം ഞങ്ങൾ സൈഫൈയിലേക്ക് പോയി. അദ്ദേഹത്തിന്റെ ഗ്രാമവും ആളുകളേയും കാണണണെന്ന് ഞാൻ അദ്ദേഹത്തോട് പറഞ്ഞു. എന്നിട്ട് ഞങ്ങൾ സൈക്കിളെടുത്ത് ആ ഗ്രാമം മുഴുവൻ ചുറ്റി. ആ സന്ദേശമാണ് ജനങ്ങളിലേക്ക് എത്തിക്കാൻ ശ്രമിച്ചതെന്നും” തേജ് പ്രതാപ് പറഞ്ഞു.

#WATCH | Patna: Bihar's Environment, Forest and Climate Change minister and RJD leader Tej Pratap Yadav rides a bicycle to the secretariat. He says that he saw late SP patron Mulayam Singh Yadav in his dreams and took inspiration from him to use a bicycle to save the environment. pic.twitter.com/Zh3EDruEAC

— ANI (@ANI) February 22, 2023