ഇലക്ട്രിക് വാഹനങ്ങൾക്ക് റോഡ് നികുതിയും രജിസ്‌ട്രേഷൻ ഫീസുമില്ല; മൂന്ന് വർഷത്തേക്ക് ഓഫറുമായി യോഗി സർക്കാർ

ലക്‌നൗ : വൈദ്യുതി വാഹനങ്ങളെ പ്രോത്സാഹിപ്പിക്കുന്നതിന്റെ ഭാഗമായി റോഡ് നികുതിയിലും രജിസ്‌ട്രേഷൻ ഫീസിലും ഇളവ് നൽകാനൊരുങ്ങി യോഗി സർക്കാർ. 2022 ഒക്ടോബർ 14 ന് ശേഷം വാഹനം വാങ്ങിയവർക്ക് മൂന്ന് വർഷത്തേക്കാണ് ഈ ഇളവ് ലഭിക്കുക. ഇത് കൂടാതെ സംസ്ഥാനത്ത് തന്നെ നിർമ്മിക്കുന്ന ഇലക്ട്രിക് വാഹനങ്ങൾ വാങ്ങുമ്പോൾ ഇളവ് അഞ്ച് വർഷത്തേക്ക് ലഭിക്കും.

ഉത്തർപ്രദേശ് ഇലക്ട്രിക് വെഹിക്കിൾ മാനുഫാക്ചറിംഗ് ആൻഡ് മൊബിലിറ്റി പോളിസി 2022 അനുസരിച്ച്, ഒക്ടോബർ 14 മുതൽ 2025 ഒക്ടോബർ 13 വരെ ഉത്തർപ്രദേശിൽ വിൽക്കുകയും രജിസ്റ്റർ ചെയ്യുകയും ചെയ്യുന്ന ഇലക്ട്രിക് വാഹനങ്ങൾക്ക് 100 ശതമാനം നികുതി ഇളവ് നൽകുമെന്ന് പ്രിൻസിപ്പൽ സെക്രട്ടറി എൽ. വെങ്കിടേശ്വർലു പുറത്തിറക്കിയ വിജ്ഞാപനത്തിൽ പറയുന്നു.

2025 ഒക്ടോബർ 14 മുതൽ 2027 ഒക്ടോബർ 13 വരെ, സംസ്ഥാനത്ത് നിർമ്മിച്ചതും വിൽക്കുന്നതുമായ വാഹനങ്ങൾക്ക് 100 ശതമാനം റിബേറ്റ് നൽകും. ഇത് പ്രാബല്യത്തിൽ വരുന്നുണ്ടെന്ന് ഉറപ്പാക്കാൻ എല്ലാ ജില്ലകളിലെയും ആർടിഒമാർക്ക് നിർദ്ദേശങ്ങൾ നൽകിയിട്ടുണ്ട്.

ബാറ്ററികളോ അൾട്രാപാസിറ്ററുകളോ ഇന്ധന സെല്ലുകളോ ഉപയോഗിച്ച് പ്രവർത്തിക്കുന്ന ഇലക്ട്രിക് മോട്ടോറുകൾ ഘടിപ്പിച്ചിരിക്കുന്ന എല്ലാ വാഹനങ്ങളെ വൈദ്യുതി വാഹനങ്ങളായി കണക്കാക്കുന്നു. ഇരുചക്രവാഹനങ്ങൾ, മുച്ചക്ര വാഹനങ്ങൾ, നാലുചക്ര വാഹനങ്ങൾ, സ്‌ട്രോങ് ഹൈബ്രിഡ് ഇലക്ട്രിക് വെഹിക്കിൾ (HEV), പ്ലഗ്-ഇൻ ഹൈബ്രിഡ് ഇലക്ട്രിക് വെഹിക്കിൾ (PHEV), ബാറ്ററി ഇലക്ട്രിക് വെഹിക്കിൾ (BEV), ഫ്യുവൽ സെൽ ഇലക്ട്രിക് വെഹിക്കിൾ (FCEV) എന്നിവയും ഇതിൽ ഉൾപ്പെടുന്നു.

ഇലക്ട്രിക് വാഹനങ്ങൾ വാങ്ങുന്നതിന് കേന്ദ്ര സർക്കാർ നൽകുന്ന സബ്സിഡിക്ക് പുറമെയാണ് യുപി സർക്കാരിന്റെ ഇളവ്. കേന്ദ്ര സർക്കാരും സംസ്ഥാന സർക്കാരും നൽകുന്ന ഈ ഇളവുകൾ കൂട്ടിച്ചേർത്താൽ ഇരുചക്രവാഹനങ്ങൾക്ക് 15,000 മുതൽ 20,000 രൂപ വരെയും കാറുകൾക്ക് ഒരു ലക്ഷം രൂപ വരെയും വില കുറയും. പോളിസി അനുസരിച്ച്, സംസ്ഥാനത്ത് വാങ്ങുന്ന ഇലക്ട്രിക് വാഹനങ്ങളുടെ ഫാക്ടറി വിലയിൽ 15 ശതമാനം സബ്സിഡിയും നൽകും.