ഹൈദരാബാദ് : ഉപഭോക്താക്കൾക്ക് ഭക്ഷണം എത്തിക്കുന്നതിൽ ഏറെ പ്രശസ്തമായ സൊമാറ്റോ സോഷ്യൽ മീഡിയയിലെ കിടിലൻ പോസ്റ്റുകളിലൂടെയും ശ്രദ്ധ ആകർഷിക്കുന്നുണ്ട് . ഇത്തവണ സൊമാറ്റോ പങ്ക് വച്ച ട്വീറ്റ് അൽപ്പം വ്യത്യസ്തമാണ് . ഭക്ഷണത്തിന് പകരം കഞ്ചാവ് എത്തിക്കുമോ എന്ന് ഒരു ഉപഭോക്താവ് ചോദിച്ചതായാണ് സൊമാറ്റോ വെളിപ്പെടുത്തിയത് .
ദേശീയ തലസ്ഥാനമായ ഡൽഹിക്ക് സമീപമുള്ള ഗുരുഗ്രാമിൽ നിന്നുള്ള ശുഭം എന്ന ഉപഭോക്താവ് കഞ്ചാവ് ആവശ്യപ്പെട്ടതായി സൊമാറ്റോ ട്വിറ്ററിൽ പോസ്റ്റ് ചെയ്തു. “ഗുരുഗ്രാമിൽ നിന്നുള്ള ശുഭം 14 തവണ ചോദിച്ചു, മരിജുവാന നൽകുമോ എന്ന്. ഞങ്ങൾ കഞ്ചാവ് വിതരണം ചെയ്യുന്നില്ലെന്ന് ആരെങ്കിലും അദ്ദേഹത്തോട് പറയൂ,” സൊമാറ്റോ ട്വീറ്റ് ചെയ്തു. സൊമാറ്റോയുടെ ട്വീറ്റ് വൈറലായിരിക്കുകയാണ്.
അതേസമയം ശുഭം എന്ന ഉപഭോക്താവ് സൊമാറ്റോയ്ക്ക് മറുപടിയുമായും രംഗത്തെത്തി ‘ ഹലോ സൊമാറ്റോ ഞാൻ ഗുരുഗ്രാമിലല്ല ഡൽഹിയിലാണ് താമസിക്കുന്നത്. എല്ലാ വർഷവും ഹോളി സമയത്ത് ഭംഗ് കഴിക്കുന്നത് ഒരു ആചാരമാണ്. കാരണം എന്റെ ജന്മദിനം ഹോളി ദിനത്തിലാണ്. ദയവായി എന്റെ സാഹചര്യം മനസിലാക്കാൻ ശ്രമിക്കുക,” എന്നായിരുന്നു ശുഭത്തിന്റെപോസ്റ്റ് .
അതേസമയം, കഞ്ചാവിനെക്കുറിച്ചുള്ള ട്വീറ്റ് ഡൽഹി പോലീസിന്റെയും ശ്രദ്ധയിൽപ്പെട്ടു. തൂടർന്ന് ‘ആരെങ്കിലും ശുഭമിനെ കണ്ടാൽ… ഭാംഗ് കുടിച്ച് വാഹനമോടിക്കരുതെന്ന് പറയൂ’ എന്ന് പോലീസും ട്വീറ്റ് ചെയ്തു .
Discussion about this post