രാജസ്ഥാൻ: മോഹൻലാലിനെ നായകനാക്കി ലിജോ ജോസ് പെല്ലിശേരി ഒരുക്കുന്ന ചിത്രമാണ് മലൈക്കോട്ടൈ വാലിബൻ. രാജസ്ഥാനിൽ ഉൾപ്പെടെ ചിത്രീകരണം പുരോഗമിക്കുന്ന ചിത്രത്തിന്റെ ലൊക്കേഷനിൽ നടന്ന ഒരു ബെർത്ത്ഡേ ആഘോഷചിത്രം പങ്കുവെച്ച് നടൻ ഹരീഷ് പേരടി മോഹൻലാലിനെക്കുറിച്ച് കുറിച്ച വാക്കുകളാണ് ആരാധകർ ഇപ്പോൾ ഏറ്റെടുത്തിരിക്കുന്നത്.
സിനിമയിലൂടെ ലിജോ ജോസ് പെല്ലിശ്ശേരി അവതരിപ്പിക്കുന്ന യുവനടൻ മനോജ് മോസസിന്റെ പിറന്നാൾ ആഘോഷമായിരുന്നു വേദി. ലിജോ അവതരിപ്പിക്കുന്ന പുതുമുഖ നടൻ മനോജിന്റെ പിറന്നാളാണ്… മുന്നിൽ നിൽക്കുന്ന ഞങ്ങളല്ല താരങ്ങൾ… വലിപ്പ ചെറുപ്പുമില്ലാതെ പകയും വിദ്വേഷവുമില്ലാതെ എല്ലാവരെയും കൂടെ നിർത്തുന്ന.. എല്ലാവരെയും മുന്നിലേക്ക് തള്ളി നിർത്തുന്ന..ആ പിന്നിൽ നിൽക്കുന്ന ആ മഞ്ഞ കുപ്പായക്കാരനാണ് യഥാർത്ഥ താരം..
നമ്മുടെ ലാലേട്ടൻ.. അയാൾക്ക് പകരം മറ്റൊരാൾ ആയിരുന്നെങ്കിൽ ഒരു നോ മതി… ഞാനൊന്നും ഈ സിനിമയിലെ ഉണ്ടാകില്ല..പക്ഷെ ആ മനുഷ്യൻ എന്നോടെന്നല്ല ആരോടും അങ്ങിനെ പറയില്ല… അഭിമാനത്തോടെ ഞാൻ പറയും..ഇത് മഹാനടൻ മാത്രമല്ല…മഹാ മനുഷ്യത്വവുമാണ്..ഒരെയൊരു മോഹൻലാൽ എന്നായിരുന്നു ഹരീഷ് പേരടിയുടെ വാക്കുകൾ.
ആഘോഷത്തിന്റെ ചെറിയ വീഡിയോ ദൃശ്യങ്ങളും ചിത്രത്തിലെ മറ്റ് അഭിനേതാക്കൾ പുറത്തുവിട്ടിട്ടുണ്ട്. അമ്പരന്ന് നിൽക്കുന്ന മനോജ് മോസസിനെ മോഹൻലാൽ ആണ് കേക്ക് മുറിക്കാനായി മുൻപിലേക്ക് നീക്കി നിർത്തുന്നത്. ‘നിന്റെയല്ലേ ബർത്ത്ഡേ നീയല്ലേ കേക്ക് മുറിക്കേണ്ടത്’ എന്ന് പറഞ്ഞാണ് മോഹൻലാൽ മനോജിനെ മുൻപിലേക്ക് കൈപിടിച്ചു കൊണ്ടുവരുന്നത്. ഹരീഷ് പേരടി ഉൾപ്പെടെയുളളവരെ ദൃശ്യങ്ങളിൽ കാണാം.
മലൈക്കോട്ടെ വാലിബന്റെ ടൈറ്റിൽ അനൗൺസ് ചെയ്തപ്പോൾ മുതൽ മോഹൻലാൽ ആരാധകർ പ്രതീക്ഷയോടെയാണ് കാത്തിരിക്കുന്നത്. ബംഗാളി നടി കഥ നന്ദി ഉൾപ്പെടെ ചിത്രത്തിൽ അഭിനയിക്കുന്നുണ്ട്. മനോജിന്റെ ബർത്ത്ഡേ സെലിബ്രേഷന്റെ ചിത്രങ്ങളും വീഡിയോയും കഥ നന്ദിയും പങ്കുവെച്ചിട്ടുണ്ട്.
Discussion about this post