‘അതെ, എന്റെ നാവിന് നീളം കൂടുതലാണ്’, ലോകത്തിലെ ഏറ്റവും നീളമുള്ള നാവുള്ളയാള്‍ക്ക് അടുത്ത റെക്കോഡ്

ലോകത്തിലെ ഏറ്റവും നീളമേറിയ നാക്കുള്ളയാള്‍(പുരുഷന്‍) എന്ന റെക്കോഡ് അമേരിക്കക്കാരനായ നിക്ക് സ്‌റ്റോബേളിനാണ്. 10.1 സെമി (3.97 ഇഞ്ച്) ആണ് ഇദ്ദേഹത്തിന്റെ നാവിന്റെ വലുപ്പം. ഇപ്പോഴിതാ നിക്ക് മറ്റൊരു ലോകറെക്കോഡ് കൂടി നേടിയിരിക്കുകയാണ്. ഏറ്റവും വേഗത്തില്‍ ജെങ്ക ബ്ലോക്കുകള്‍ നാവുകൊണ്ട് നീക്കിയ വ്യക്തിയെന്ന ഗിന്നസ് ലോക റെക്കോഡാണ് അദ്ദേഹം പുതിയതായി നേടിയിരിക്കുന്നത്. ഗിന്നസ് ബുക്കിലെ വിവരങ്ങള്‍ അനുസരിച്ച് 55.526 സെക്കന്‍ഡിനുള്ളില്‍ നിക്ക് നാവുകൊണ്ട് അഞ്ച് ജെങ്കബ്ലോക്കുകള്‍ മാറ്റി.

ഗിന്നസ് ലോക റെക്കോഡിനുടമയായത് തന്റെ ജീവിതം തന്നെ മാറ്റിമറിച്ചുവെന്നാണ് നിക്ക് പറയുന്നത്. അതുകാരണം വിവിധ രാജ്യങ്ങളിലേക്ക് പോകാനും വ്യത്യസ്ത സംസ്‌കാരങ്ങള്‍ കാണാനും നല്ല മനുഷ്യരുമായി കറങ്ങിനടക്കാനും നല്ല ഭക്ഷണം കഴിക്കാനും സാധിച്ചതായി നിക്ക് പറയുന്നു. കുട്ടിക്കാലത്ത് താന്‍ നോക്കിയിരുന്ന ബുക്കില്‍ ഇടം നേടാന്‍ സാധിച്ചത് വലിയ അംഗീകാരമാണെന്നും അദ്ദേഹം കൂട്ടിച്ചേര്‍ത്തു.

നാവിന്റെ ശരാശരി നീളം സ്ത്രീകളില്‍ 7.9 സെമി(3.11 ഇഞ്ചും) പുരുഷന്മാരില്‍ 8.5സെമി(3.34 ഇഞ്ചും) ആണ്. പക്ഷേ നിക്കിന്റെ നാവിന്റെ നീളം 10.1 സെമി (3.97 ഇഞ്ച്) ആണ. ആദ്യമായി ലോകറെക്കോഡ് നേടിയപ്പോള്‍ തന്റെ നാവ് എന്തെങ്കിലും കാര്യങ്ങള്‍ക്ക് ഉപയോഗപ്പെടുത്തണമെന്ന ആഗ്രഹമുണ്ടായിരുന്നുവെന്നും അപ്പോഴാണ് ഇന്ത്യയില്‍ ഒരാള്‍ നാവ് ഉപയോഗിച്ച് പെയിന്റ് ചെയ്യുന്നത് കണ്ടതെന്നും നിക്ക് പറയുന്നു. അതില്‍ പ്രചോദനം കൊണ്ട നിക്ക് എന്തെങ്കിലും കലാപരമായ കാര്യങ്ങള്‍ക്ക് തന്റെ നാവ് ഉപയോഗപ്പെടുത്തുമെന്ന് തീരുമാനിച്ചു. അങ്ങനെ നാവ് ഉപയോഗിച്ചുള്ള പെയിന്റിംഗ് നിക്കും ആരംഭിച്ചു.

ഗിന്നസ് ബുക്കിലെ വിവരം അനുസരിച്ച് ഒരുമിനിറ്റില്‍ ഏറ്റവും കൂടുതല്‍ തവണ നാക്ക് കൊണ്ട് മൂക്കില്‍ തൊടുന്നതിലെ റെക്കോഡ് തകര്‍ക്കാനും നിക്ക് ശ്രമിച്ചിട്ടുണ്ട്. നിലവില്‍ ഒരു മിനിറ്റില്‍ 281 തവണ നാക്ക് കൊണ്ട് മൂക്കില്‍ തൊട്ട റെക്കോഡാണ് ഉള്ളത്. പക്ഷേ നിക്കിന് 246 തവണയേ ചെയ്യാനായുള്ളു.