കളമശ്ശേരി: വേറിട്ട ക്യാമ്പയിന് എറണാകുളം ജില്ലയിൽ തുടക്കമിട്ട് കേരള മോട്ടോർ വാഹന വകുപ്പ്. താങ്ക്സ്, സോറി, പ്ലീസ് എന്ന ക്യാമ്പെയ്നിലൂടെ പരസ്പര സഹകരണമുള്ള, ബഹുമാനമുള്ള റോഡ് ഉപയോഗവും റോഡ് സംസ്കാരവും വാർത്തെടുക്കാനാണ് ലക്ഷ്യമിടുന്നത്. അതുവഴി മാനസിക സംഘർഷങ്ങൾ ഇല്ലാത്ത, സമാധാനപരമായ അന്തരീക്ഷം റോഡിൽ സംജാതമാകുമെന്ന് മോട്ടോർ വാഹന വകുപ്പ് വ്യക്തമാക്കി. ഹൈക്കോടതി ജഡ്ജി ജസ്റ്റീസ് ദേവൻ രാമചന്ദ്രൻ ക്യാമ്പെയ്ൻ ഉദ്ഘാടനം ചെയ്തു.
വാഹനമോടിക്കുന്നവർ മറ്റുളളവരെക്കൂടി പരിഗണിക്കണമെന്ന് അദ്ദേഹം പറഞ്ഞു. മനുഷ്യന്റെ മര്യാദയാണ് നിയമങ്ങൾ. അത് പാലിക്കുന്നത് നമുക്ക് വേണ്ടിയല്ല, മറ്റുളളവർക്ക് വേണ്ടി കൂടിയാണ്. അന്താരാഷ്ട്ര തലത്തിൽ പോലും അംഗീകരിക്കപ്പെട്ട കാര്യമാണ് റോഡിലെ നിയമങ്ങൾ. ആരാണോ ഏറ്റവും ചെറുത് അവർക്കാകണം മുൻഗണന എന്നാണ് നമ്മൾ പഠിക്കേണ്ടത്. റോഡിനെ സംബന്ധിച്ച് അത് കാൽനട യാത്രക്കാരാണ്. അതുകൊണ്ടു തന്നെ മുൻഗണന അവർക്കായിരിക്കണമെന്നും ഇക്കാര്യം എത്ര പേർക്ക് അറിയാമെന്നും അദ്ദേഹം ചോദിച്ചു.
കൊച്ചിൻ ഷിപ്യാർഡ് ലിമിറ്റഡിന്റെ സഹകരണത്തോടെയാണ് ക്യാമ്പെയ്ൻ മോട്ടോർ വാഹന വകുപ്പ് നടപ്പിലാക്കുക. മലയാളത്തിലെ പ്രമുഖ വ്യക്തിത്വങ്ങൾ അണിനിരക്കുന്ന 6 ക്യാമ്പയിൻ വീഡിയോകൾ ഇതിനായി തയ്യാറാക്കിയിട്ടുണ്ട്.
കളമശ്ശേരി രാജഗിരി ഹയർ സെക്കൻഡറി സ്കൂൾ ഓഡിറ്റോറിയത്തിൽ നടന്ന ചടങ്ങിൽ സിനിമാതാരം മഞ്ജു വാര്യർ ക്യാമ്പയിൻ ലോഗോ പ്രകാശനം ചെയ്തു. ക്യാമ്പയിൻ ടീഷർട്ടുകളുടെ ഡിസൈൻ ലോഞ്ച് ജില്ലാ കളക്ടർ നിർവഹിച്ചു. കൊച്ചിൻ ഷിപ്യാർഡ് ചെയർമാനും മാനേജിംഗ് ഡയറക്ടറുമായ മധു എസ് നായർ ക്യാമ്പയിൻ വീഡിയോകളുടെ പ്രകാശനം നിർവഹിച്ചു.
Discussion about this post