മുംബൈ: ടൂർണമെന്റിലെ ഏറ്റവും മികച്ച രണ്ട് ടീമുകൾ തന്നെ പരസ്പരം ഏറ്റുമുട്ടുമ്പോൾ, പ്രഥമ വനിതാ പ്രീമിയർ ലീഗ് ക്രിക്കറ്റ് ഫൈനലിൽ നടക്കാൻ പോകുന്നത് തകർപ്പൻ പോരാട്ടം തന്നെ ആയിരിക്കും എന്ന കാര്യം നിസ്തർക്കമാണ്. കഴിഞ്ഞ ദിവസം നടന്ന എലിമിനേറ്ററിൽ യുപി വാറിയേഴ്സിനെതിരെ അനായാസ ജയം നേടിയാണ് മുംബൈ ഇന്ത്യൻസ അർഹിക്കുന്ന ഫൈനൽ ബർത്ത് ഉറപ്പാക്കിയത്. 72 റൺസിന്റെ ആധികാരിക ജയത്തോടെയാണ് മുബൈയുടെ ഫൈനൽ പ്രവേശം.
ടോസ് നേടി ബൗളിംഗ് തിരഞ്ഞെടുത്ത യുപി വാറിയേഴ്സിനെതിരെ മുംബൈ 20 ഓവറിൽ 4 വിക്കറ്റ് നഷ്ടത്തിൽ 182 റൺസ് എടുത്തു. മറുപടി ബാറ്റിംഗിൽ യുപിക്ക് 17.4 ഓവറിൽ 110 റൺസ് എടുക്കാനേ സാധിച്ചുള്ളൂ. 38 പന്തിൽ 72 റൺസുമായി പുറത്താകാതെ നിന്ന നാറ്റ് സീവർ ബ്രന്റിന്റെയും ഹാട്രിക് ഉൾപ്പെടെ 4 വിക്കറ്റ് വീഴ്ത്തിയ ഇസി വോംഗിന്റെയും പ്രകടനങ്ങളാണ് മുംബൈക്ക് അനായാസ ജയം സമ്മാനിച്ചത്.
ടൂർണമെന്റിന്റിൽ ആദ്യാവസാനം ശക്തമായ പോരാട്ടം കാഴ്ചവെച്ച ടീമുകളാണ് മുംബൈ ഇന്ത്യൻസും ഡൽഹി ക്യാപ്പിറ്റൽസും. ലീഗ് ഘട്ടത്തിൽ പരസ്പരം ഏറ്റുമുട്ടിയപ്പോൾ ഇരുവരും ഓരോ ജയവുമായി തുല്യത പാലിച്ചു. ആദ്യ ഘട്ടത്തിൽ ഒന്നാമതായി മുന്നേറിയ മുംബൈ അവസാന ഘട്ടത്തിൽ 2 തോൽവികളുമായി പോയിന്റ് പട്ടികയിൽ രണ്ടാം സ്ഥാനത്തേക്ക് പോയി. അവസാന ഘട്ടത്തിൽ നടത്തിയ മികച്ച പോരാട്ടം ഡൽഹിയെ ഒന്നാം സ്ഥാനത്തോടെ നേരിട്ട് ഫൈനലിലേക്ക് എത്തിക്കുകയായിരുന്നു.
