തിരുവനന്തപുരം: നിയമസഭയിലുണ്ടായ സംഘർഷത്തിൽ കയ്യൊടിഞ്ഞതിന് പിന്നാലെ കെ.കെ രമയ്ക്കെതിരെ നടത്തിയ വ്യാജ പ്രചാരണത്തിൽ കേസ് കൊടുക്കാൻ ആർഎംപി. സിപിഎം സംസ്ഥാന സെക്രട്ടറി എം.വി ഗോവിന്ദൻ, സച്ചിൻ ദേവ് എംഎൽഎ എന്നിവർക്കും സിപിഎം മുഖപത്രം ദേശാഭിമാനിയ്ക്കുമെതിരെയാണ് കേസ് കൊടുക്കുക. വിഷയത്തിൽ സ്പീക്കർക്ക് കത്ത് നൽകുമെന്നും ആർഎംപി വ്യക്തമാക്കി.
സിപിഎം കേന്ദ്രങ്ങളുടെ അറിവോടെയാണ് രമയ്ക്കെതിരെ വധഭീഷണിയും നിയമ സഭയിൽ സംഘർഷവും ഉണ്ടായത്. രമയ്ക്കെതിരായ ആക്രമണത്തിന് പിന്നിൽ സിപിഎം ഗൂഢാലോചനയുണ്ട്. ഇക്കാര്യങ്ങൾ അന്വേഷിക്കണമെന്ന് ആവശ്യപ്പെട്ട് സ്പീക്കർക്ക് കത്ത് നൽകുമെന്നും ആർഎംപി അറിയിച്ചു.
നിയമസഭിയിലുണ്ടായ സംഘർഷത്തിൽ കെകെ രമയ്ക്ക് പരിക്കേറ്റിട്ടില്ലെന്നും, രമയുടേത് നാടകമാണെന്നുമുള്ള തരത്തിലായിരുന്നു സച്ചിൻ ദേവ് എംഎൽഎയുടെയും സിപിഎമ്മിന്റെയും പ്രചാരണം. സമൂഹ മാദ്ധ്യമങ്ങളിൽ രമയ്ക്കെതിരെ സൈബർ ആക്രമണം നടത്തുകയും സിപിഎം ചെയ്തിരുന്നു. സംഭവത്തിൽ നേരത്തെ സച്ചിൻ ദേവിനെതിരെ രമ പരാതി നൽകിയിരുന്നു. ഇതിന് പിന്നാലെയാണ് നടപടി സ്വീകരിക്കാൻ ആർഎംപിയും ഒരുങ്ങുന്നത്.
