മൊഹാലി: ഐപിഎല്ലിൽ പഞ്ചാബ് കിംഗ്സിനെതിരെ ഗുജറാത്ത് ടൈറ്റൻസിന് ആവേശജയം. 6 വിക്കറ്റിനാണ് ഗുജറാത്തിന്റെ വിജയം. ടോസ് നേടി ബൗളിംഗ് തിരഞ്ഞെടുത്ത ഗുജറാത്ത്, പഞ്ചാബിനെ 20 ഓവറിൽ 153/8ൽ ഒതുക്കി. മറുപടി ബാറ്റിംഗിൽ ഒരു പന്ത് അവശേഷിക്കെ, 4 വിക്കറ്റ് നഷ്ടത്തിൽ ഗുജറാത്ത് ലക്ഷ്യം മറികടന്നു.
36 റൺസെടുത്ത മാത്യു ഷോർട്ടാണ് പഞ്ചാബിന്റെ ടോപ് സ്കോറർ. മികച്ച ഫോമിൽ കളിച്ചുവന്ന ക്യാപ്ടൻ ശിഖർ ധവാൻ പെട്ടെന്ന് പുറത്തായത് അവർക്ക് തിരിച്ചടിയായി. ഗുജറാത്തിന് വേണ്ടി ആദ്യ മത്സരം കളിച്ച പേസ് ബൗളർ മോഹിത് ശർമ്മ 4 ഓവറിൽ 18 റൺസ് മാത്രം വഴങ്ങി 2 വിക്കറ്റ് വീഴ്ത്തി. റാഷിദ് ഖാൻ, ജോഷ്വാ ലിറ്റിൽ, അൽസാരി ജോസഫ്, മുഹമ്മദ് ഷമി എന്നിവർക്ക് ഓരോ വിക്കറ്റ് ലഭിച്ചു.
ഓപ്പണർ ശുഭ്മാൻ ഗില്ലിന്റെ തകർപ്പൻ അർദ്ധ സെഞ്ച്വറിയാണ് ഗുജറാത്തിന് ജയം സമ്മാനിച്ചത്. ഗിൽ 49 പന്തിൽ 67 റൺസെടുത്തു. ഓപ്പണർ വൃദ്ധിമാൻ സാഹ 19 പന്തിൽ 30 റൺസ് നേടി. അവസാന ഓവറിൽ ഗില്ലിനെ പുറത്താക്കി സാം കറൻ ഭീഷണി ഉയർത്തിയെങ്കിലും, തെവാട്ടിയയും മില്ലറും സമ്മർദ്ദത്തെ അതിജീവിച്ച് ഗുജറാത്തിനെ വിജയത്തിൽ എത്തിക്കുകയായിരുന്നു.
ഇന്നത്തെ വിജയത്തോടെ, നിലവിലെ ചാമ്പ്യന്മാരായ ഗുജറാത്ത് ടൈറ്റൻസ് പോയിന്റ് പട്ടികയിൽ മൂന്നാം സ്ഥാനത്തേക്ക് ഉയർന്നു.
Discussion about this post