കമാൻഡർ ഉൾപ്പെടെ മൂന്ന് കമ്യൂണിസ്റ്റ് ഭീകരരെ വധിച്ച് സുരക്ഷാ സേന; ആയുധങ്ങളും സ്‌ഫോടക വസ്തുക്കളും പിടിച്ചെടുത്തു

മുംബൈ : മഹാരാഷ്ട്രയിൽ കമ്യൂണിസ്റ്റ് ഭീകരരെ വധിച്ച് സുരക്ഷാ സേന. ദലാം കമാൻഡർ ഉൾപ്പെടെ മൂന്ന് ഭീകരരെയാണ് പോലീസിലെ സി 60 കമാൻഡോസ് വധിച്ചത്. മാനെ രാജാറാമിനും പെരിമിലി സായുധ ഔട്ട്പോസ്റ്റിനും ഇടയിലുള്ള കെദ്മാറയിലെ വനത്തിലാണ് ഏറ്റുമുട്ടൽ നടന്നത്.

പെരിമിലി ദളത്തിന്റെ കമാൻഡർ ബിറ്റ്ലു മാഡവി, പെരിമിലി ദളത്തിലെ വാസു, അഹേരി ദളത്തിലെ ശ്രീകാന്ത് എന്നിവരാണ് മരിച്ചത്. മാർച്ച് ഒമ്പതിന് വിദ്യാർത്ഥിയെ കൊലപ്പെടുത്തിയ കേസിലെ മുഖ്യപ്രതിയാണ് ബിറ്റ്‌ലു മാഡവി.

വനത്തിൽ കമ്യൂണിസ്റ്റ് ഭീകരർ ക്യാമ്പ് ചെയ്തതായി പോലീസിന് രഹസ്യ വിവരം ലഭിച്ചിരുന്നു. വിവരത്തിന്റെ അടിസ്ഥാനത്തിൽ ഗഡ്ചിറോളി പോലീസ് കാട്ടിൽ തിരച്ചിൽ നടത്തി. തിരച്ചിലിനിടെ പോലീസിന് നേരെ കമ്യൂണിസ്റ്റ് ഭീകരർ വെടിയുതിർത്തു. തുടർന്ന് നടത്തിയ പ്രത്യാക്രമണത്തിലാണ് ഭീകരരെ വധിച്ചത്. ഇവരിൽ നിന്ന് ആയുധങ്ങളും സ്‌ഫോടക വസ്തുക്കളും കണ്ടെടുത്തു. പ്രദേശത്ത് തിരച്ചിൽ ഇപ്പോഴും തുടരുകയാണ്.