പ്രഭാസ് നായകനായെത്തുന്ന ബ്രഹ്മാണ്ഡ ചിത്രം ആദിപുരുഷിന്റെ ഓഡിയോ ലോഞ്ച്കഴിഞ്ഞ ദിവസമാണ് നടന്നത്. സംഗീത സംവിധായകരായ അജയും അതുലും ഒന്നിച്ചാണ് ജയ് ശ്രീറാം എന്ന ഗാനം ലൈവ് ഓർക്കസ്ട്രയോടെ പുറത്തിറക്കിയത്. ഇപ്പോഴിതാ ഏറ്റവുമധികം ആളുകൾ കണ്ട വീഡിയോ എന്ന റെക്കോർഡ് സ്വന്തമാക്കിയിരിക്കുകയാണ് ഈ ഗാനം.
24 മണിക്കൂറിനിടെ യൂട്യൂബിൽ ഏറ്റവുമധികം ആളുകൾ കണ്ട ഗാനം ”ജയ് ശ്രീറാം” ആണ്. വോർബ് പുറത്തുവിട്ട ഡാറ്റ പ്രകാരം, ഗാനം 26,291,237 പേർ കാണുകയും അതിന് 484,186 ലൈക്കുകൾ ലഭിക്കുകയും ചെയ്തു. അക്ഷയ് കുമാറിന്റെ ക്യാ ലോഗെ തും എന്ന ചിത്രത്തെ മറികടന്നുകൊണ്ടുള്ള നേട്ടമാണിത്.
ഈ ഗാനത്തിന്റെ പ്രചോദനം ഗാനത്തിന്റെ പേര് തന്നെയാണ് എന്നാണ് സംഗീത സംവിധായകൻ അജയ് പറഞ്ഞത്. ”ഞങ്ങൾ സിനിമയ്ക്ക് വേണ്ടി ആദ്യമായി സംഗീതം നൽകിയ ഗാനമാണിത്. ശ്രീരാമന്റെ പേര് കേട്ടയുടനെ ആ ശക്തിയും ഭക്തിയും താനേ നമ്മിൽ വന്നുചേരും. ഞങ്ങൾ പാട്ട് നിർമ്മിക്കുമ്പോൾ പോലും ഈ മാന്ത്രികശക്തി ഞങ്ങളോടൊപ്പമുണ്ടായിരുന്നു.’ അദ്ദേഹം വ്യക്തമാക്കി. വരും തലമുറകളിലേക്ക് പ്രതിധ്വനിക്കുന്ന ഗാനമാണിതെന്നും ചിത്രത്തിന്റെ അണിയറപ്രവർത്തകർ പറഞ്ഞു.
രാമ-രാവണ യുദ്ധം പശ്ചാത്തലമാക്കിയാണ് ചിത്രമൊരുങ്ങുന്നത്. തിന്മയ്ക്ക് മേൽ നന്മയുടെ വിജയം എന്ന പ്രമേയത്തിലാണ് ചിത്രം പ്രേക്ഷകരിലേക്ക് എത്തുന്നത്. തെലുങ്ക്, മലയാളം, ഹിന്ദി, കന്നഡ, തമിഴ് എന്നീ ഭാഷകളിൽ പ്രദർശനത്തിനെത്തുന്ന ചിത്രത്തിന്റെ റിലീസ് ജൂൺ 16-നാണ്.
