പാകിസ്ഥാന് ശക്തമായ മുന്നറിയിപ്പുമായി ഇന്ത്യൻ വ്യോമസേനാ മേധാവി എയർ ചീഫ് മാർഷൽ എ.പി. സിങ്. ‘ഓപ്പറേഷൻ സിന്ദൂർ’ ദൗത്യത്തിലൂടെ 1,200 കിലോമീറ്റർ വീതിയിലും 200 കിലോമീറ്റർ ആഴത്തിലും വ്യോമസേന നടത്തിയ കൃത്യതയാർന്ന ആക്രമണങ്ങൾ ഇന്ത്യയുടെ കൈയെത്താത്ത ഒരു ലക്ഷ്യവുമില്ലെന്ന് തെളിയിച്ചതായി അദ്ദേഹം വ്യക്തമാക്കി. വാർത്താ ഏജൻസിയായ പി.ടി.ഐക്ക് നൽകിയ പ്രത്യേക അഭിമുഖത്തിലാണ് എയർ ചീഫ് മാർഷൽ വ്യോമസേനയുടെ കരുത്തും ഭാവി തന്ത്രങ്ങളും വിശദീകരിച്ചത്.
പഹൽഗാം ഭീകരാക്രമണത്തിന് മറുപടിയായി നടത്തിയ ഓപ്പറേഷൻ സിന്ദൂർ, ഇന്ത്യയുടെ വ്യോമശക്തി രാജ്യത്തിന്റെ പ്രാഥമിക പ്രതിരോധ സംവിധാനവും തന്ത്രപരമായ തടസ്സക്കോട്ടയുമാണെന്ന് അടിവരയിടുന്നു. ഏതൊരു ശത്രു തന്ത്രങ്ങൾ മാറ്റുമ്പോഴും അതിവേഗം അനുയോജ്യമായ മാറ്റങ്ങൾ വരുത്താനും നിരന്തരം ബദൽ മാർഗ്ഗങ്ങൾ കയ്യിൽ കരുതാനും സേനയ്ക്ക് സാധിക്കണമെന്നാണ് ഈ ദൗത്യം നൽകുന്ന പ്രധാന പാഠം. ഒരു പ്രത്യേക ആയുധത്തെയോ പ്ലാറ്റ്‌ഫോമിനെയോ മാത്രം ആശ്രയിക്കാതെ വിവിധ സംവിധാനങ്ങളെ കോർത്തിണക്കിയുള്ള ‘കപ്പാസിറ്റി സെൻട്രിക്’ രീതിയാണ് സേന സ്വീകരിച്ചത്. ആക്രമണത്തിന്റെ വ്യാപ്തി നിയന്ത്രിക്കാനും കൃത്യമായ തിരിച്ചടി നൽകാനും ഈ വഴക്കം സഹായിച്ചുവെന്നും അദ്ദേഹം ചൂണ്ടിക്കാട്ടി.
1971-ലെ ബംഗ്ലാദേശ് വിമോചന യുദ്ധത്തിന് ശേഷം ഇന്ത്യ നടത്തിയ ഏറ്റവും സാഹസികമായ അതിർത്തി കടന്നുള്ള സൈനിക നടപടിയായിരുന്നു കഴിഞ്ഞ വർഷം മെയ് മാസത്തിൽ നടന്ന ഓപ്പറേഷൻ സിന്ദൂർ. തദ്ദേശീയമായി വികസിപ്പിച്ച പല ആയുധ സംവിധാനങ്ങളും ശത്രുവിന്റെ ഭൂപ്രദേശത്തിനുള്ളിൽ കടന്നുചെന്ന് വൻ പ്രഹരം ഏൽപ്പിക്കുന്നതിൽ മികച്ച പ്രകടനം കാഴ്ചവെച്ചു. പൊതുജനങ്ങൾക്ക് ഒരുവിധത്തിലുമുള്ള നാശനഷ്ടങ്ങൾ വരുത്തരുതെന്ന (‘സീറോ കൊളാറ്ററൽ ഡാമേജ്’) സേനയുടെ നിബന്ധന ദൗത്യത്തിലുടനീളം കൃത്യമായി പാലിക്കുകയും ചെയ്തു. പാകിസ്താൻ വിക്ഷേപിച്ച നിരവധി ഡ്രോണുകളെയും മിസൈലുകളെയും പ്രതിരോധിക്കാൻ തദ്ദേശീയ വ്യോമപ്രതിരോധ സംവിധാനത്തിന് സാധിച്ചതായി അദ്ദേഹം കൂട്ടിച്ചേർത്തു.
ഭാവിയിൽ എഐ, ബഹിരാകാശ സാങ്കേതികവിദ്യ, സൈബർ, ഇലക്ട്രോണിക് വാർഫെയർ എന്നിവ കോർത്തിണക്കി ‘വികസിത് ഭാരത് 2047’ ലക്ഷ്യങ്ങൾക്ക് അനുസൃതമായി ഇന്ത്യൻ വ്യോമസേനയെ ലോകത്തിലെ ഏറ്റവും വലിയ സ്വയംപര്യാപ്ത വ്യോമശക്തിയായി വളർത്തുകയാണ് ലക്ഷ്യമെന്നും എയർ ചീഫ് മാർഷൽ എ.പി. സിങ് വ്യക്തമാക്കി.
