”നരേന്ദ്ര മോദി എനിക്ക് നാട്ടു നാട്ടു ഗാനം കാണിച്ചുതന്നു; അത് ഞാൻ തീർച്ചയായും പഠിക്കും;” ഓസ്‌ട്രേലിയൻ ഗായകൻ പറയുന്നു

സിഡ്‌നി : പ്രധാനമന്ത്രി നരേന്ദ്ര മോദിയുമായി കൂടിക്കാഴ്ച നടത്തി പ്രമുഖ ഓസ്‌ട്രേലിയൻ ഗായകൻ ഗയ് തിയോഡർ സെബാസ്റ്റിയൻ. നരേന്ദ്ര മോദിയെ നേരിട്ട് കാണാനായത് തന്റെ ഭാഗ്യമായി കരുതുന്നുവെന്ന് ഇന്ത്യയിൽ വേരുകളുളള ഗായകൻ പറഞ്ഞു. ഗയ് സെബാസ്റ്റ്യന്റെ അമ്മ കാൻപൂർ സ്വദേശിയാണ്.

നരേന്ദ്ര മോദിയെ നേരിട്ട് കാണാനായത് ഏറ്റവും വലിയ ബഹുമതിയാണ്. ഞങ്ങൾ കുറേയേറെ കാര്യങ്ങൾ സംസാരിച്ചു. വളരെ ദയാശീലനായ അദ്ദേഹം എല്ലാം ബഹുമാനത്തോടെ ശ്രദ്ധിച്ചു കേട്ടു. ഞങ്ങൾ സംഗീതത്തെക്കുറിച്ചും സംസാരിച്ചു. ”നാട്ടു നാട്ടു” എന്ന ഇന്ത്യൻ ഗാനം അദ്ദേഹമെന്നെ കാണിച്ചു. അതുകൊണ്ട് ഞാൻ അത് തീർച്ചയായും പഠിക്കും. കാൺപൂർ സ്വദേശിനിയായ എന്റെ അമ്മയെക്കുറിച്ചും ഞങ്ങൾ സംസാരിച്ചു” ഗയ് സെബാസ്റ്റ്യൻ പറഞ്ഞു.

Guy Sebastian is a remarkable singer and has unparalleled passion towards music. In addition, he is passionate about social service as well. I was glad to have interacted with him today. @GuySebastian https://t.co/b3ZRfS3Fwx pic.twitter.com/mx7B6krQF6

— Narendra Modi (@narendramodi) May 23, 2023

”ഗയ് സെബാസ്റ്റ്യൻ ശ്രദ്ധേയനായ ഗായകനാണ്. സംഗീതത്തോട് അദ്ദേഹത്തിന് സമാനതകളില്ലാത്ത അഭിനിവേശമുണ്ട്. സാമൂഹിക സേവനത്തിലും അദ്ദേഹത്തിന് താൽപ്പര്യമുണ്ട്. ഇന്ന് അദ്ദേഹവുമായി സംസാരിക്കാൻ സാധിച്ചതിൽ വളരെയധികം സന്തോഷമുണ്ട്” പ്രധാനമന്ത്രി ട്വിറ്ററിൽ കുറിച്ചു.

2003 ലെ ആദ്യത്തെ ഓസ്ട്രേലിയൻ ഐഡൽ ജേതാവാണ് ഗയ് സെബാസ്റ്റിയൻ.
41 കാരനായ സംഗീതജ്ഞൻ 2010 മുതൽ 2012 വരെയും, 2015 മുതൽ 2016 വരെയും ഓസ്ട്രേലിയയുടെ ദി എക്സ് ഫാക്ടർ പരിപാടിയുടെ വിധികർത്താവായി പ്രവർത്തിച്ചു. 2019 മുതൽ ‘ദ വോയ്സ് ഓസ്ട്രേലിയയുടെ’ പരിശീലകനായിരുന്നു.